Bir neshe jıllardan berli bilimli, intalı jaslardı jetilistirip shıǵarıwda jaqsı kórsetkishlerge erisip kiyatırǵan Ájiniyaz atındaǵı NMPI akademiyalıq liceyi búgingi kúni de jańa tabısları menen kózge túspekte.
Akademiyalıq liceyde Jaslar kúni múnásibeti menen ushırasıw keshesi shólkemlestirildi. Onda akademiyalıq licey direktorı Q.Qalxorazov, NMPI oqıtıwshısı, bilimlendiriw sapasın qadaǵalaw bólimi bas qánigesi J.Jumamuratov, jaslar menen islesiw boyınsha direktor orınbasarı G.Masharipovalar liceydiń oqıwshı jasları menen ushırastı.
Onda Prezidentimiz tárepinen jaslar ushın jaratıp berilip atırǵan imkaniyatlar, bilim alıw, til úyreniw hám sanlı texnologiyalardan orınlı paydalanıw boyınsha sóz etilip, olarǵa usınıslar bildirildi.
Ilaj sońında “Siz ekologiyalıq nızamlıqlardı bilesiz be?” Respublikalıq tańlawında I orındı iyelegen liceydiń “Qara tal” komandasınıń kreativ pikirleytuǵın, bilimli aǵzaları Húrmet jarlıǵı menen sıylıqlandı. Komanda aǵzaları jaqında bolıp ótetuǵın Ózbekstan Respublikası basqıshına jollamanı qolǵa kirgizip, múnásip qatnasıw ushın tayarlanbaqta.
Sonday-aq, oqıw ornında bilim alıp atırǵan intalı, bilimli on oqıwshınıń «Akademiyalıq licey maqtanıshı» stipendiyasın alıw imkaniyatına iye bolıwı múnásibeti menen olardı Húrmet jarlıqları menen sıylıqlap, oqıwlarında tabıs tiledi. Akademiyalıq liceyde barlıq pánlerden joqarı kórsetkishlerge iye hám belsendi oqıwshılar hár semestrde “Akademiyalıq licey maqtanıshı” stipendiyası menen qollap-quwatlanıp barılatuǵınlıǵı ilajda atap ótildi.
Sáwbetlesiw usılında ótken ushırasıwda oqıwshı jaslar ózlerin qızıqtırǵan sorawlarına tiyisli juwaplar aldı.
Qaraqalpaqstan xabar agentligi