Ámiwdárya rayonındaǵı “Bozjap” awıl puqaralar jıyınında 68-sanlı ulıwma orta bilim beriw mektebi ushın jańa, zamanagóy qosımsha oqıw imaratı hám 12×24 ólshemdegi zamanagóy sport zalı paydalanıwǵa tapsırıldı. Bul imarattıń ulıwma bahası 5 milliard 950 million sumdı qurap, 330 oqıwshıǵa mólsherlengen. Jańa orın zamanagóy arxitekturalıq sheshim, qolaylı bilimlendiriw ortalıǵı menen ózine tán.
Ashılıw máresiminde Oliy Majlis Nızamshılıq palatasınıń deputatı Sapargúl Utemuratova hám basqalar qatnasıp, bul dóretiwshilik jumıslar elimizde bilimlendiriw sistemasın bunnan bılay da rawajlandırıw, jaslardıń sapalı bilim alıwı ushın jaratılıp atırǵan sharayatlardıń ayqın kórinisi ekenin atap ótti.
– Jańa imarat tek ǵana 68-sanlı ulıwma orta bilim beriw mektebi ushın emes, al rayonnıń bilimlendiriw tarawınıń rawajlanıwı ushın da xızmet etetuǵını menen áhmiyetli, – deydi rayon hákiminiń orınbasarı Nodirbek Kamalov. – Bul jerde erteńgi kúni sırt ellerdiń abıraylı joqarı bilimlendiriw mákemeleriniń studentleri jetisip shıǵadı, dep úmit bildiremiz.
Jańa imarat 3 qabattan ibarat bolıp, barlıq zamanagóy talaplarǵa tolıq juwap beredi. Eń áhmiyetlisi, mektepke arnawlı lift ornatılıp, inklyuziv bilimlendiriw talapları tiykarında zárúr sharayatlar jaratıldı. Bul bolsa imkaniyatı sheklengen balalar ushın da sapalı bilim alıw imkaniyatın keńeytedi.
Házirgi kúnde mektepte 227 oqıwshı tálim-tárbiya almaqta. Olarǵa 27 tájiriybeli pedagog sabaq bermekte.
Qaraqalpaqstan xabar agentligi