Indoneziya paytaxtı Djakarta qalasında jaslar arasında sporttıń qılıshlasıw túri boyınsha ótkerilip atırǵan Aziya chempionatında sablya baǵdarı boyınsha komandalıq jarıs óz juwmaǵına jetti.
Qızlar arasında ótkerilgen bul jarısqa kontinetimizdiń eń kúshli 16 saylandı komandası qatnasıp, óz-ara bellesti. Atap aytqanda, komandamız aǵzaları 1/8 finalda Avstraliyanı 45:18, yarım finalda Qazaqstandı 45:37 esabında jeńip shıǵıwǵa miyasar boldı.
Al, finallıq bellesiwde bolsa, saylandı komandamız qızları qıtaylı sportshılarǵa jeńilip qaldı.
Quwanıshlı tárepi sonda, mámleketimiz saylandı komandası quramında Errera Lara Luiza Fernanda menen birge, respublikamız wákillerinen Nargiza Jaqsıbaeva, Ayakóz Jumamuratova hám Nargiza Utebaevalar háreket etip, olar Aziya chempionatınıń gúmis medalı menen sıylıqlandı.

Adilbay Orazov,
Qaraqalpaqstan xabar agentligi sholıwshısı