ÓzLiDeP Nókis qalalıq Keńesiniń deputatları hám jámiyetlik shólkemlerdiń wákilleri qatnasıwında jámiyetlik esap beriw májilisi bolıp ótti. Onda qalanı sociallıq-ekonomikalıq rawajlandırıw, abadanlastırıw jumıslarınıń nátiyjeliligi hám xalıqtıń bántligin támiyinlew máseleleri dodalandı.
Májiliste Nókis qalalıq Abadanlastırıw basqarması tárepinen ótken 2025-jılı ámelge asırılǵan jumıslar boyınsha esabat berildi. Esabatta “Jasıl mákan” ulıwma milliy joybarı sheńberinde ámelge asırılǵan kóklemzarlastırıw jumısları, qala kósheleri hám magistral jollardıń boylarına mıńlaǵan terek nálleri otırǵızılǵanı, zamanagóy suwǵarıw sistemaları engizilgeni atap ótildi. Sonday-aq, máwsimlik gúller egiw, jasıl aymaqlardı keńeytiw hám agrotexnikalıq tárbiyalaw jumısları turaqlı dawam ettirilmekte.
2025-jıl dawamında qala ishki jolların ońlaw, asfalt-beton qaplamalar tósew hám qum-щeben qaplamalı jollar shólkemlestiriw boyınsha keń kólemli jumıslar ámelge asırıldı. Drenaj sistemaların jańalaw, jańa qudıqlar qurıw hám irrigaciya tarmaqların tazalaw arqalı infrastrukturanı jaqsılawǵa ayrıqsha itibar qaratıldı. Sonıń menen birge, sırtqı jaqtılandırıw tarmaqların modernizaciyalaw, quyash panelli shıraqlar hám videobaqlaw úskenelerin ornatıw jumısları basqıshpa-basqısh ámelge asırılmaqta.
Esabat dawamında 2026-jılǵa mólsherlengen rejeler de dodalandı. Atap aytqanda, qosımsha irrigaciya nasosların ornatıw, jańa suwǵarıw tarmaqların qurıw, ishki jollardı ońlaw, drenaj sistemaların keńeytiw hám zamanagóy ıssıxana qurıw rejelestirilgeni málim etildi. Deputatlar tárepinen bildirilgen pikir-usınıslar inabatqa alınıp, qalanı jáne de abat hám qolaylı aymaqqa aylandırıw boyınsha anıq wazıypalar belgilep alındı.

Qaraqalpaqstan xabar agentligi