Nókis qalasındaǵı 47-sanlı hám Nókis rayonındaǵı 17-sanlı ulıwma bilim beriw mektepleri menen birgelikte “English is the key to a bright future” (Inglis tili – jarqın keleshek gilti) atamasında ruwxıy-aǵartıwshılıq hám oqıw ilajı bolıp ótti.
Ilajda atap ótilgenindey, Ózbekstan Respublikası Ministrler Kabinetiniń 2021-jıl 19-maydaǵı “Shet tillerin úyreniwdi ǵalaba en jaydırıwdı nátiyjeli shólkemlestiriw ilajları haqqında”ǵı qararı tiykarında oqıwshılardıń shet tillerin puqta úyreniwin támiyinlew maqsetinde Qaraqalpaqstan Respublikasına sırt mámleketlerden 63 oqıtıwshı tartıldı.
– Búgingi globallasıw dáwirinde shet tillerin, ásirese, inglis tilin jetik biliw jaslar ushın tek ǵana jeńillik emes, al dáwir talabına aylandı, – deydi Nókis rayonı 17-sanlı ulıwma orta bilim beriw mektebiniń direktorı Maqset Begdullaev. – Usı maqsette shólkemlestirilgen bul ilaj eki bilimlendiriw dárgayı arasında óz-ara tájiriybe almasıwdı bekkemlew hám oqıwshılardıń til úyreniwge bolǵan ıqlasın arttırıwǵa xızmet etti.
Ilajda Filippin hám Hindstan mámleketlerinen de oqıtıwshılar qatnasıp, mámleketimizde shet tillerine qaratılıp atırǵan itibar ayrıqsha atap ótildi. Shártnamaǵa tiykar, hindstanlı pedagog Muhammad al Taf Nókis rayonındaǵı 17-sanlı ulıwma bilim beriw mektebinde usı jıldıń yanvar ayınan baslap oqıw jılı juwmaǵına shekem inglis tilinen sabaq beriwi názerde tutılǵan.

Qaraqalpaqstan xabar agentligi.