Mámleketimiz basshısı Sh.M.Mirziyoev basshılıǵında 2026-jıl 24-fevral kúni jaslar menen ashıqtan-ashıq sóylesiw tárizinde ótkerilgen videoselektor jıynalısında hár hápteniń piyshembi kúni «Jaslar kúni» sıpatında belgilep berilgen edi.
Bul tapsırmanıń orınlanıwın támiyinlew maqsetinde Bozataw rayonında ámeliy jumıslar alıp barılmaqta. Atap aytqanda, Kóksuw awıl puqaralar jıyını aymaǵında «Jaslar kúni» sheńberinde «Basshı hám jaslar» ushırasıwı ótkerildi.
Ótkerilgen ushırasıwǵa Bozataw rayonı hákimi B.Ubbiniyazov, rayon prokurorı J.Ashirbaev hám rayonlıq Ishki isler bólimi baslıǵı U.Kurbanbaeva, sonday-aq, tiyisli taraw basshıları hám jaslar qatnastı.
Ashıqtan-ashıq sáwbetlesiw túrinde ótkerilgen ilajda jaslar ózlerin qızıqtırǵan sorawlarǵa juwaplar aldı. Sonıń menen birge, jaslardıń bilimlendiriw, sport hám sociallıq máseleler boyınsha usınısları dıqqat penen tıńlandı. Basshılar orınlarda júzege kelgen mashqalalardı óz waqtında sheshiw boyınsha juwapkerlerge anıq tapsırmalar berdi.
Ótkerilgen «Jaslar kúni» ilajları jaslardıń sociallıq belsendiligin arttırıwǵa hám olardıń mámleketlik basqarıwǵa bolǵan isenimin bekkemlewge xızmet etedi. Al, basshılardıń jaslar menen turaqlı baylanısta bolıwı – keleshek iyeleriniń óz potencialın júzege shıǵarıwına úlken tayanısh boladı.
Usı mazmundaǵı ushırasıw Aspantay awıl puqaralar jıyını aymaǵında da bolıp ótti.

Qaraqalpaqstan xabar agentligi