Berdaq atındaǵı Qaraqalpaq mámleketlik universitetinde Bul qanshadan-qansha jaslar bilim alıp, jaslıq jıllarınıń studentlik altın dáwirin ótkergen. Búgingi kúnde de universitet bilim alıw niyetinde bolǵan jaslardıń qádirdan bilim jurtı esaplanadı.
Prezidentimizdiń elimiz jasları menen bolǵan sóylesiwinen soń berilgen tapsırmalardı ámelge asırıw, jaslar menen jaqınnan sáwbetlesip olardıń pikirhám usınısların tıńlap, mashqalaların sheshiw ushın tiyisli taraw basshılarınıń qatnasıwında jaslar kúni belgilengen edi. Usı múnásibet penen Berdaq atındaǵı Qaraqalpaq mámleketlik universitetiniń 9-sanlı studentler úyinde “Rektor hám jaslar” ushırasıwı bolıp ótti. Ushırasıwdı universitettiń jaslar máseleleri ruwxıy hám aǵartıwshılıq isleri boyınsha prorektorı S.Alawatdinov alıp bardı.
Ilajda Berdiyar Jollıbekov shıǵıp sóylep, universitette ámelge asırılıp atırǵan jumıslar hám aldaǵı rejeler haqqında aytıp ótti. Atap aytqanda, búgingi kúnde studentler ushın shet tillerin úyreniw, sanlastırıw, zamanagóy texnologiyalar hám jasalma intellekt baǵdarlarında bilim hám kónlikpelerge iye bolıw ayrıqsha áhmiyetke iye ekenin atap ótti.
Rektor házirgi dáwir studentleri zaman menen teń qádem taslap, básekige shıdamlı qánige bolıp jetisiwi zárúrligin sóz etti hám sonday-aq, ushırasıwda studentlerdiń baslamaların qollap-quwatlaw, olardıń startap joybarları hám innovaciyalıq ideyaların ámelge asırıw ushın zárúr sharayatlar jaratıw universitet administraciyasınıń tiykarǵı wazıypalarınan biri ekenin atap ótti.
Ushırasıw dawamında jaslardıń huqıqları menen máplerin qorǵaw, olardıń sociallıq belsendiligin arttırıw, jetekshilik kónlikpelerin rawajlandırıw, ruwxıy-aǵartıwshılıq tárbiyanı kúsheytiw máselelerine de ayrıqsha itibar qaratıldı.
Ilajda student-jaslar ózlerin qızıqtırǵan sorawlarǵa tolıq juwaplar aldı hám universitet basshıları menen tikkeley sáwbetlesiw imkaniyatınan quwanıshlı ekenliklerin bildirdi.

Qaraqalpaqstan xabar agentligi