Búgin, 27-fevral pútkil dúnyada Xalıqaralıq mámleketlik emes kommerciyalıq emes shólkemler kúni sıpatında belgilenedi. Xalıqaralıq MKShlar kúni birinshi márte 2014-jılı belgilengen.
Bul sáne MKShlardıń jumısın tán alıw hám olardıń jámiyetlik turmıstaǵı ornın jáne de arttırıw maqsetinde alǵa qoyılǵan. Baslama xalıqaralıq dárejede qollap-quwatlanıp, Birlesken Milletler Shólkemi sheńberinde de tán alınǵan.
MKShlar – jámiyettiń belsendi hám intaker bólegi sıpatında sociallıq qorǵaw, bilimlendiriw, densawlıqtı saqlaw, insan huqıqları, qorshaǵan ortalıqtı qorǵaw hám basqa da kóplegen baǵdarlarda áhmiyetli wazıypalardı ámelge asırıp kelmekte. Olar xalıqtıń sociallıq qorǵawǵa mútáj qatlamların qollap-quwatlaw hám puqaralıq jámiyetin qáliplestiriwge úles qosadı. Jámiyetlik qadaǵalawdı kúsheytiw, áhmiyetli mashqalalarǵa innovaciyalıq sheshimler usınıs etiw jáne mámleket hám jámiyet arasında qarım-qatnas kópiri wazıypasın atqarıwda MKShlardıń ornı áhmiyetli.
Ózbekstanda da sońǵı jılları MKShlardıń jumısı ushın keń imkaniyatlar jaratılmaqta. MKShlardı qollap-quwatlawǵa qaratılǵan nızamshılıq bazası jetilistirildi. Olardıń baslama hám joybarları jámiyettiń rawajlanıwına múnásip úles qospaqta. Mámleketlik grantlar, sociallıq buyırtpalar hám subsidiyalar sisteması engizildi.
Búgingi kúnde mıńlaǵan MKShlar hár qıylı tarawlarda jumıs alıp barıp, xalıqtıń abadanlıǵı hám jámiyettiń rawajlanıwına úles qosıp kiyatırǵanı itibarǵa ılayıq.

M.Komilova, ÓzA