Qaraqalpaqstan Respublikası Veterinariya hám sharwashılıqtı rawajlandırıw komitetinde ǵalaba xabar qurallarınıń wákilleri menen ashıq sáwbetlesiw shólkemlestirildi.
Maqset – bazarlarǵa satıw ushın shıǵarılıp atırǵan sharwashılıq hám azıq-awqat ónimleriniń veterinariyalıq-sanitariyalıq talaplarǵa muwapıqlıǵın támiyinlew, tutınıwshılardıń salamatlıǵın qorǵaw hám ámelge asırılıp atırǵan qadaǵalaw jumısları boyınsha keń jámiyetshilikti hár tárepleme xabardar etiwden ibarat.
Ashıq sáwbetlesiw dawamında, IIMniń Jámiyetlik qáwipsizlik xızmeti Jámiyetlik tártipti saklaw basqarmasınıń Karantin ilajların támiyinlew toparı komandiri D.Bekmuratov, Qaraqalpaqstan Respublikası haywanlar kesellikleri diagnostikası hám azıq-awqat ónimleri qáwipsizligi laboratoriyalıq orayı shıpakeri A.Aydarova, Nókis qalasındaǵı Oraylıq diyqan bazarınıń 1-sanlı veterinariyalıq-sanitariyalıq ekspertiza meńgeriwshisi N.Dáryabaevlar ámelge asırılıp atırǵan jumısları tuwralı maǵlıwmat berdi.
Atap aytqanda, diyqan bazarlarında ótkerilip atırǵan qadaǵalaw hám monitoring jumıslarınıń nátiyjeleri, veterinariyalıq-sanitariyalıq ekspertiza processleri, anıqlanıp atırǵan qaǵıydabuzarlıqlar hám olardı saplastırıw ilajları, azıq-awqat qáwipsizligin támiyinlew boyınsha kórilip atırǵan sistemalı ilajlar, isbilermenler hám tutınıwshılar ushın jaratılıp atırǵan qolaylıqlar atap ótilip, pikir-usınıslar bildirildi.
Atap ótilgenindey, respublikamızda búgingi kúngde 20 diyqan bazarı jumıs islep turıptı hám olardıń hár birinde veterinariyalıq-sanitariyalıq espertiza laboratoriyalarınıń jumısı jolǵa qoyılǵan. Haywanlardıń kesellikleri diagnostikası, azıq-awqat ónimleri qáwipsizligi, sharwa mallarınıń góshi hám gósh ónimleri, qus, balıq, máyek, pal, ósimlik (palız) ónimleri turaqlı túrde espertizadan ótkerilip, anıqlanǵan kemshilikler óz waqtında saplastırılıp barılmaqta.
Atap aytqanda, mal góshinen jaramsızlıǵı boyınsha 17 jaǵday anıqlanıp, 78 kg. gósh zıyansızlandırıw jolı menen joq etildi. Bunnan basqa, qoy, eshki, shoshqa, at, túye, tawıq góshlerin tekseriwler dawamında, balıq ónimlerin teksergende anıqlanǵan jaramsız ónimler de zıyansızlandırıw jolı menen joq etildi. Tiyisli uyımlarǵa usınıslar berilip, veterinariyalıq-sanitariyalıq talaplardı buzǵan shaxslarǵa tiyisli shara kórilmekte.
Ilajda qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi