Hár bir mámleket sırtqı siyasatın ámelge asırıwda diplomatiyalıq baylanıslardı bekkemlew, xalıqaralıq qatnasıqlardı rawajlandırıw hám óz-ara paydalı birge islesiwge ayrıqsha áhmiyet qaratadı. Joqarı dárejedegi rásmiy saparlar tek ǵana isenimdi bekkemlep qoymastan, al sherikliktiń jańa baǵdarların da belgilep beredi. ÓzA bul rubrika arqalı joqarı dárejedegi sóylesiwler, kóterilgen máseleler hám qol qoyılǵan hújjetler boyınsha hápte dawamındaǵı maǵlıwmatlardı usınadı.
Pakistan Bas ministri Dohada Qatar Ámiri menen ushırastı
Bas ministr Muhammad Shahboz Sharif Doxaǵa saparı waqtında Qatar Ámiri Shayx Tamim bin Hamad Ol Soniy menen ushırastı hám eki tárepleme birge islesiwdi bekkemlewge sadıqlıǵın tastıyıqladı. Sóylesiw dawamında siyasiy hám ekonomikalıq baylanıslardı keńeytiw máselesi dodalandı. Tárepler strategiyalıq sheriklikti rawajlandırıwǵa tayar ekenin bildirdi.
Izrail – Hindstan: tariyxıy sapar aldında
Búgin azanda Izrail Ministrler Kabinetiniń májilisinde Hindstan Bas ministri Narendra Modidiń kútilip atırǵan tariyxıy saparı haqqında sóz boldı. Sapar sheńberinde innovaciya, qáwipsizlik hám ulıwma strategiyalıq baǵdarlar boyınsha birge islesiwdi keńeytiw, sonday-aq, jasalma intellekttuallıq hám regionallıq birge islesiw tarawlarındaǵı baylanıslardı jańa basqıshqa alıp shıǵıw máseleleri dodalanadı.
Vetnam – AQSh: Tınıshlıq keńesi sheńberindegi joqarı dárejedegi sóylesiw
Vetnam húkimran partiyasınıń bas xatkeri To Lam Vashingtonda AQSh Prezidenti Donald Tramp penen sóylesiw ótkerdi. Ushırasıwda strategiyalıq sheriklikti bekkemlew, sawda-ekonomikalıq birge islesiwdi keńeytiw jáne Gazanı tiklew hám gumanitarlıq járdemdi muwapıqlastırıw máseleleri dodalandı. Bul sóylesiw Gaza tınıshlıǵı boyınsha jańa xalıqaralıq baslamanıń áhmiyetli basqıshı bolıp esaplanadı.
BAÁ – Belgiya: siyasiy másláhátlesiw
Birlesken Arab Ámirlikleri hám Belgiya Sırtqı isler ministrlikleri arasında siyasiy másláhátlesiw bolıp ótti.
Sóylesiw dawamında tiykarǵı itibar “jasıl energetika”, ásirese qayta tiklenetuǵın energiya hám vodorod tarawında birge islesiwdi kúsheytiwge qaratıldı. Bul ushırasıw eki mámleket siyasiy, ekonomikalıq qatnasıqların jańa baǵdarlarda rawajlandırıwǵa xızmet etedi.
Hindstan – Braziliya: aviaciya hám transport birge islesiwi
Hindstan hám Braziliya uzaq aralıqqa hawa qatnawı ushın “Travel Corridor” (sapar jolı) ashıwǵa kelisti. Bul eki mámleket arasında transport, turizm hám sawda baylanısların keńeytiw jolında áhmiyetli qádem bolıp esaplanadı.

Fardona YaXShIBOEVA,
ÓzAnıń xabarshısı