Ózbekstan Ekologiya hám klimat ózgeriwi milliy komitetiniń baslıǵı Aziz Abduhakimov “Euronews” basshısı Pedro Vargas Davidqa ekologiya tarawına baylanıslı baslamalardı sáwlelendiriw hám xalıqaralıq birge islesiwdi rawajlandırıwǵa qosqan úlesi ushın “Tábiyat qorǵawshısı” kókirek belgisin tapsırdı. Ushırasıw sheńberinde “Euronews” basshısı komitettiń jumısı menen jaqınnan tanıstı. Bul haqqında mákemeniń baspasóz xızmeti xabar bergen.
Tárepler málimleme birge islesiwin keńeytiw, mámleketimizdiń ekologiyalıq kún tártibin xalıqaralıq maydanda úgit-násiyatlaw, qorshaǵan ortalıqtı qorǵaw, klimat ózgeriwine qarsı gúresiw boyınsha birgeliktegi media-joybarlardı ámelge asırıw perspektivasın dodaladı. Sonday-aq, globallıq klimat kún tártibi sheńberinde respublikamızdıń baslamalarına xalıqaralıq jámiyetshiliktiń itibarın tartıw, ekologiyalıq mádeniyattı arttırıw hám “jasıl” rawajlanıw ideyasın ǵalaba en jaydırıw temalarına ayrıqsha itibar qaratıldı. Sapar sheńberinde miymanlar ushın komitet sisteması boyınsha tanıstırıw ekskursiyası shólkemlestirildi.

F. Yaxshiboeva, ÓzA