Búgin Londonda Ózbekstan delegaciyası Ullı Britaniya investiciyalar boyınsha mámleket ministri lord Jeyson Stokvud penen ushırastı. Tárepler sanaat, energetika, infrastruktura, awıl xojalıǵı, áhmiyetli paydalı qazılmalar, densawlıqtı saqlaw hám sanlı texnologiyalar tarawlarındaǵı birge islesiw imkaniyatın talladı.
Densawlıqtı saqlaw tarawında birge islesiw haqqında Túsinisiw memorandumına qol qoyıldı. Bul hújjet Ózbekstanda farmacevtika islep shıǵarıw quwatlılıǵın arttırıwǵa tiykar jaratadı. Bunday baslamalar eki mámleket arasında turaqlı ekonomikalıq ósiw hám juwapkershilikli sheriklikti bekkemlewge xızmet etedi.
Sonday-aq, “Standard Chartered” bankiniń bas direktorı Saif Malik penen iri sanaat joybarların qarjılandırıw, “jasıl” energetika baslamaların qollap-quwatlaw hám ekonomikanıń real sektorı menen baylanıslardı bekkemlewdi dodalawǵa ayrıqsha itibar qaratıldı. Qayta tiklenetuǵın energetika, infrastruktura hám turaqlı qarjılandırıw temaları da kórip shıǵıldı.
Bunnan tısqarı, “Benoy” kompaniyasınıń bas direktorı Tom Kartleyj menen zamanagóy qala qurılısı joybarları, Jańa Tashkent qurılısı, aymaqlardı rejelestiriw jáne transport hám turizm infrastrukturasın jetilistiriw boyınsha sóylesiw alıp barıldı. Óz-ara birgeliktegi baslamalar birge islesiwdi bunnan bılay da rawajlandırıwǵa xızmet etetuǵını bir awızdan maqullandı.

F. Yaxshiboeva, ÓzA