Búgingi kúni elimizde ósip kiyatırǵan jas áwladtıń hár tárepleme salamat hám bilimli insanlar bolıp jetilisiwine ayrıqsha itibar qaratılmaqta. Ásirese, balalar salamatlıǵın qorǵaw mámleketimiz siyasatınıń baslı baǵdarınıń biri desek asıra aytqan bolmaymız.
Ózbekstan Jurnalistler awqamı Qaraqalpaqstan bólimi hám Respublika Densawlıqtı saqlaw ministrliginiń shólkemlestiriwi menen Respublikalıq balalar stomatologiya poliklinikasında press-tur ótkerildi.
Oǵan respublikamızda óz dóretiwshiligin alıp barıp atırǵan ǵalaba xabar qurallarınıń wákilleri qatnastı.
Ilajda poliklinikanıń bólim baslıǵı Gúlzabiyra Annaqulova sońǵı jılları poliklinika turmısında júz berip atırǵan jańalıqlar, islengen jumıslar hám aldaǵı isleniwi tiyis wazıypalar haqqında keń túrde aytıp berdi.
– Poliklinikamız Nókis qalası hám respublikamızdıń barlıq aymaqlarınan kelgen balalarga stomatologiyalıq xızmet kórsetedi, – deydi G.Annaqulova. – Poliklinika eki qabatlı qolaylastırılǵan imaratta jaylasqan bolıp, birinshi qabatında hákimshilik-xojalıq kabinetleri menen birge xojalıq esabındaǵı bólim jaylasqan.
Ekinshi qabatta emlew bólimi, xirurgiya kabineti, PCS kabineti, fizioterapiya kabineti jaylasqan.
Jumıs waqtı azanǵı saat 8:00 den keshki saat 18:00 ge deyin belgilengen. Poliklinika bir kúnde 250 balanı qabıllaw múmkinshiligine iye. Stomatologiyalıq járdem barlıq balalarǵa biypul kórsetiledi. Sonıń menen birge, poliklinikada Qaraqalpaqstan medicina institutı stomatologiya isi fakulteti oqıw bazası bolıp, studentlerge ámeliy hám teoriyalıq sabaqları ótiledi. Sonday-aq, 2-sanlı Abu Ali Ibn Sina atındaǵı jámiyetlik salamatlıq texnikumınıń tis texnigi kánigelikleri ushın da ámeliy oqıw sabaqların ótiw bazası bolıp esaplanadı.
Poliklinika tolıǵı menen modernizaciyalanıp, házirgi zamanagóy ásbap-úskeneler menen támiyinlengen. Bıyılǵı jıldan baslap elimizdiń barlıq aymaqlarında bolǵanı sıyaqlı, poliklikamızda DMED sistemasında jumıs júrgiziw jolǵa qoyıldı hám hámme kabinetlerdegi shıpakerler kompyuter menen támiyinlendi. Sonlıqtan 52 poliklinika xızmetkerleri IT boyınsha oqıp sertifikatların aldı.
Poliklinikamızda balalarǵa tislerdi emlew hám alıw, awızdaǵı silekey qabatı keselligin, júz-jaqtıń tis qatarlarınıń anomaliyasın emlew, shólkemlestirilgen mektep balalarına stomatologiyalık keselliklerdiń aldın alıw jumısların alıp barıw hám emlew túrinde stomatologiyalıq járdem kórsetedi.
Ilaj dawamında jurnalistler poliklinika turmısı menen jaqınnan tanısıp, búgingi kúni keń jámiyetshilikti qızıqtırıp júrgen máselelerge juwaplar aldı.

Adilbay Orazov, Qaraqalpaqstan xabar agentligi sholıwshısı