Arqa-batıs áskeriy okruginde áskeriy xızmetkerlerdiń shańaraqların qollap-quwatlaw, hayal-qızlardıń sociallıq belsendiligin arttırıw hám milliy qádiriyatlardı úgit-násiyatlaw maqsetinde “Men úlgili áskeriy shańaraq biykesimen” súreni astında “Bárekella hayallar” tańlawınıń okruglik basqıshı ótkerildi.
Áskeriy shańaraqlarda salamat ruwxıy ortalıqtı bekkemlew, shańaraq institutın qádirlew, hayal-qızlardıń jámiyettegi ornın hám abırayın jáne de arttırıwǵa qaratılǵan bul tańlawda okrugke qaraslı áskeriy bólimlerde xızmet etip atırǵan áskeriy xızmetkerlerdiń ómirlik joldasları belsene qatnastı.
Tańlaw dawamında qatnasıwshılar tárepinen milliy lipaslardıń jarqınlıǵı, áyyemgi dástúrlerimizge tán úrp-ádetler, ózbek miymandoslıq kórkem óneri keńnen kórsetildi. Sonday-aq, tayarlanǵan qol miyneti tiykarında jaratılǵan kesteshilik hám ónermentshilik úlgileri tóreshiler quramı tárepinen joqarı bahalandı.
Kórsetilgen saxnalıq kórinisler hám dóretiwshilik shıǵıwlar arqalı áskeriy shańaraq biykeleriniń qábileti hám intakerligi jáne bir márte óz tastıyıǵın taptı. Ásirese, perzent tárbiyası, shańaraqlıq qádiriyatlar hám watansúyiwshilik temasındaǵı shıǵıwlar tamashagóylerde úlken tásir qaldırdı.
Tańlaw juwmaǵında tóreshiler quramı tárepinen eń múnásip qatnasıwshılar anıqlanıp, diplom hám estelik sawǵaları menen sıylıqlandı. Jeńimpaz bolǵan shańaraq biykesi tańlawdıń ministrlik basqıshında qatnasıw huqıqın qolǵa kirgizdi.

Qaraqalpaqstan xabar agentligi