Búgin Qanlıkól rayonı hákimi B.Sultanov, prokuror M.Tilewmuratov, IIB baslıǵı U.Xusaynovlar rayonnıń belsendi jasları menen ushırastı.
Ushırasıwda Prezidentimiz tárepinen jaslar menen sóylesiwinde belgilengen wazıypalar keńnen dodalandı.
Jaslar menen sóylesiwde ótken jılı jaslardıń bántligin támiyinlew ushın bankler hám Jaslar isleri agentligine 400 million dollar qaratılǵanı, “Jaslar biznesi” hám “Keleshekke qádem” baǵdarlamaları esabınan 15 mıń jas óz isbilermenligin jolǵa qoyıp, 50 mıń adamdı jumıs penen támiyinlegeni atap ótildi.
Bul jumıslardıń dawamı sıpatında jaslar isbilermenligin qollap-quwatlaw ushın qosımsha 200 million dollar ajıratılatuǵını járiyalandı.
Onda qarjılandırıw imkaniyatları keńeytiledi: ózin-ózi bánt etken jaslar ushın kredit muǵdarı 100 million sumnan 300 million sumǵa shekem arttırıladı. Jas isbilermenlerdiń joybarları ushın 10 milliard sumǵa shekem kredit ajıratıw múmkin boladı. Innovaciyalıq startap joybarlarına 100 mıń dollarǵa shekem investiciya kirgiziwge ruqsat beriledi. Xızmet kórsetiw hám ulıwma awqatlanıw tarawında 1 mıńnan aslam jumıs ornın jaratqan jergilikli brendlerden franshiza alıp, filial ashıwǵa qızıqqan jaslar ushın qolaylı qarjılandırıw paketleri engiziledi.
Ushırasıwda jaslardı isbilermenlikke tartıw, olardı qollap-quwatlaw, bántligin támiyinlew, bilimlendiriw hám innovaciyalıq ideyalardı ámelge asırıw máseleleri dodalandı. Sonday-aq, jaslar tárepinen bildirilgen mashqalalardı ornında sheshiw boyınsha juwapkerlerge anıq wazıypalar belgilep berildi.

Qaraqalpaqstan xabar agentligi