Qaraqalpaqstan Respublikası Joqarǵı Keńesiniń deputatı Axmed Reymov xalıq penen tikkeley sóylesiwdi jolǵa qoyıw, puqaralardı qıynap kiyatırǵan máselelerdi ornında úyreniw hám olardıń usınısları menen baslamaların tıńlaw maqsetinde, ózi saylanǵan okrugte jaylasqan Nókis qalasındaǵı Gúzar mákan puqaralar jıyını turǵınları menen ushırasıw ótkerdi.
Ushırasıwǵa aymaq turǵınları, máhálle belsendileri hám nuraniyler qatnastı.
Onda deputat Axmed Reymov elimizde, ásirese, Qaraqalpaqstan Respublikasında ámelge asırılıp atırǵan sociallıq-ekonomikalıq reformalar, sonıń ishinde, bilimlendiriw, densawlıqtı saqlaw, jol hám infrastrukturanı rawajlandırıw, isbilermenlikti qollap-quwatlaw baǵdarında ámelge asırılıp atırǵan jumıslarǵa toqtap ótti. Sonday-aq, mámleketimiz tárepinen qabıl etilgen nızamlar hám aymaq xalqınıń mápi ushın engizilgen reformalardıń áhmiyetine ayrıqsha itibar qarattı.
Bunnan soń, ol puqaralar menen sáwbetlesip, olardıń kúndelikli turmısında ushırasıp atırǵan mashqalalar, aymaq infrastrukturasın rawajlandırıw, bántlikti támiyinlew, sociallıq qorǵaw, kommunallıq xızmetlerdiń sapası, jol hám abadanlastırıw máseleleri boyınsha múrájatların tıńladı.
Deputat óz sózinde puqaralardıń múrájatları xalıq wákillikli uyımları jumısınıń tiykarǵı baǵdarlarınan biri ekenin atap ótip, hár bir múrájat nızamshılıq sheńberinde úyrenilip, tiyisli shólkemler menen birgelikte ámeliy ilajlar kóriletuǵının bildirdi. Sonday-aq, mashqalalardı sheshiwde sistemalı qatnas jasaw áhmiyetli ekenligi, ayırım máseleler qısqa múddette, ayırımları bolsa basqıshpa-basqısh ámelge asırılıwı zárúr ekenligine toqtaldı.
Ilaj sońında deputat Ramazan ayı múnásibeti menen aymaqta jasawshı ayırım járdemge mútáj shańaraqlarǵa azıq-awqat ónimlerin qayırqomlıq sawǵası sıpatında tapsırdı.

Adilbay Orazov, Qaraqalpaqstan xabar agentligi sholıwshısı