Kóksaray rezidenciyasında Prezident Shavkat Mirziyoevtiń jaslar menen sóylesiwi bolıp ótip, oǵan Qaraqalpaqstan Respublikası, wálayatlar hám Tashkent qalasındaǵı studiyalar arqalı 60 mıńnan aslam jaslardıń wákilleri qatnastı.
Sóylesiwde mámleketimizde 22 millionnan aslam jas úlken ekonomikalıq, sociallıq hám siyasiy kúsh ekeni ayrıqsha atap ótildi. Májiliste basshılar aldına jaslardı kásip-ónerge úyretiw, startap hám baslamaların qollap-quwatlaw, olardı jumıslı hám dáramatlı etiw boyınsha anıq wazıypalar qoyıldı.
Usı selektor májilisinen kelip shıǵıp, búgin Moynaq rayonı hákimi B.Menglibekov, rayon prokurorı M.Orazbaev hám rayonlıq Ishki isler bóliminiń baslıǵı J.Yusupovlar Tik ózek máhállesi jasları menen ushırasıw ótkerdi.
Onda jaslardıń bántligin támiyinlew, isbilermenlikke tartıw, kásip-óner hám shet tillerin úyreniwi ushın jaratılıp atırǵan imkaniyatlar haqqında hár tárepleme maǵlıwmat berildi.
Usı jıldan “Keleshek isbilermenleri” baǵdarlaması iske qosılıp, jas isbilermenlerge 7 jıl múddetke shekem 15 procentlik kredit ajıratıw jolǵa qoyıladı. Atap aytqanda, ózin-ózi bánt etken jaslarǵa girewsiz 20 million sumǵa shekem, isbilermenlik kónlikpesine iye bolıp biznes baslap atırǵanlarǵa 300 million sumǵa shekem, jumısın keńeytpekshi bolǵanlarǵa 2 milliard sumǵa shekem, keminde 5 pitkeriwshini jumısqa alǵan isbilermenlerge bolsa 10 milliard sumǵa shekem kredit beriletuǵını belgilendi.
Hár bir aymaqta isbilermenlikke oqıtıw, ideyanı bizneske aylandırıw, buxgalteriya, bank, marketing, ishki hám sırtqı bazarlarǵa shıǵıw boyınsha kompleksli xızmet kórsetetuǵın “Jaslar biznes inkubatorı” shólkemlestiriledi.
Usı jıldıń 1-martınan jańadan jumıs baslap atırǵan jas isbilermenlerge infrastrukturaǵa jalǵanıwǵa baylanıslı mámleketlik xızmetlerdiń qárejetleri Jaslar isbilermenligi qorı esabınan qaplap beriledi.
Ushırasıw dawamında jaslardıń pikir-usınısları tıńlanıp, olardı qıynap kiyatırǵan máseleler boyınsha juwapkerlerge anıq tapsırmalar berildi. Hár bir jigit-qızdı qollap-quwatlaw, olardıń ideya hám joybarların ámelge asırıw, jınayatshılıq hám huqıqbuzarlıqlardıń aldın alıw baǵdarında birge islesiwdi kúsheytiw boyınsha kelisip alındı.

Á.Jiyemuratov,
Qaraqalpaqstan xabar agentligi