Ózbekstan mámleketlik denetárbiyası hám sport universitetiniń Nókis filialında respublikamızda jumıs alıp barıp atırǵan ǵalaba xabar quralları xızmetkerleri ushın baspasóz konferenciyası bolıp ótti.
Onda filialdıń ilimiy hám innovaciyalıq máseleler boyınsha prorektorı, pedagogika ilimleriniń doktorı, professor Islam Mambetnazarov sońǵı jılları usı oqıw dárgayında ilimiy-izertlew hám innovaciyalıq joybarlar baǵdarında alıp barılıp atırǵan jumıslar haqqında keń túrde aytıp berdi.
– Búgingi kúni filialımızda 88 professor-oqıtıwshılar studentlerge tálim-tárbiya bermekte, – dedi ol óz sózinde. – Solardıń ishinde, ilimiy dáreje hám ataqlarǵa iye professor-oqıtıwshılar sanı 39 hám ilimiy potencial 44,3% ti quraydı. Bıyılǵı jılı 10 erkin izleniwshi doktorlıq dissertaciyaların qorǵadı. Sonnan úshewi ilim doktorı (DSc), jetewi filosofiya doktorı (PhD) diplomların alıwǵa eristi.
Sonday-aq, filialda 2025-jıldıń 25-aprel kúni “Sport túrleri teoriyası hám ámeliyatı: mashqalalar hám sheshimler”, 13-14-noyabr kúnleri «Jazǵı Olimpiada hám paralimpiada oyınlarına sportshılardı tayarlawdıń áhmiyetli mashqalaları hám sheshimleri» atamasındaǵı xalıqaralıq ilimiy-ámeliy konferenciya shólkemleskenlik penen joqarı ilimiy dárejede ótkerildi. Sonıń menen birge, ilimge qızıǵıwshı studentlerdi ilimiy maqala jazıw hám izertlewge úyretiw maqsetinde, «Sportta innovaciya» dógeregi shólkemlestirilip, oǵan 157 student tartıldı hám olarǵa ilimiy basshı sıpatında professor-oqıtıwshılar biriktirildi. Usı studentlerden bir toparı 2025-jıldıń 10-sentyabr kúni Nókis mámleketlik texnika universitetinde ótkerilgen “InnoWeek-2025” ilimiy jumıslar hám innovaciyalıq ónimler kórgizbesine ózleriniń joybarları hám prototipleri menen qatnastı.
Bólim tárepinen studentler arasında «Denetárbiyası hám olimpiya háreketi tariyxı» páninen pánler olimpiadası ótkerilip, oǵan 200den aslam jaslar qatnastı hám eń joqarı nátiyje kórsetken 3 student arnawlı sertifikat, qarjılay sıylıqlar menen sıylıqlandı.
Usılar menen bir qatarda filialdı studentler arasında «Eń jaqsı ilimiy maqalalar», «Eń jaqsı jas ilimpaz» hám «Eń jaqsı ilimiy, ámeliy hám starttap joybarlar» tańlawları ótkerilip, tańlaw jeńimpazları bólim tárepinen múnásip xoshametlendi.
Al, filialdıń velosport baǵdarınıń 4-kurs studenti D. Akmanovanıń Prezident stipendiyası, kórkem gimnastika baǵdarınıń 4-kurs studenti N. Bahawatdinovanıń I.Yusupov atındaǵı, qol tobı baǵdarı 4-kurs studenti A.Dáryabaevanıń I.Kárimov atındaǵı, kórkem gimnastika baǵdarınıń 3-kurs studentleri M.Xojambergenova hám A.Paraxatovalardıń T.Qayıpbergenov hám Pahlovan Mahmud atındaǵı mámleketlik stipendiyalar menen jeńimpaz bolıwı filialda alıp barılıp atırǵan jumıslardıń ayqın nátiyjesi bolıp tabıladı.
Sonıń menen birge, filialımız sırt ellerde jaylasqan Rossiya, Qıtay, Túrkiya, Qazaqstan, Qubla Koreya, Belarus, Qırǵız Respublikaları universitetleri menen birge islesip kelmektemiz.
Ótkerilgen ilaj dawamında jurnalistler tárepinen filial basshılarına bul baǵdarda keń jámiyetshilikti qızıqtırıp júrgen máseleler boyınsha sorawlar berilip, olarǵa juwaplar aldı.

Adilbay Orazov, Qaraqalpaqstan xabar agentligi sholıwshısı