Berdaq atındaǵı Qaraqalpaq mámleketlik universitetinde Ózbekstan Respublikası Prezidentiniń 2025-jıl 14-fevraldaǵı «Joqarı bilimlendiriw shólkemleri pitkeriwshileriniń jumısqa ornalasıwına járdemlesiw boyınsha qosımsha ilajlar haqqında»ǵı qararınıń orınlanıwın, sonday-aq, “Keleshekke qádem” baǵdarlaması sheńberinde pitkeriwshi kurs studentleriniń bántligin támiyinlew máselelerine baǵıshlanǵan ushırasıw bolıp ótti.
Ilajǵa Oliy Majlis Nızamshılıq palatası janındaǵı Jaslar parlamentinde jaslar isbilermenligi, básekini rawajlandırıw hám sanaat máseleleri komitetiniń baslıǵı, «RBG COMPANY” JShJ baslıǵı B.Radjabov hám “Keleshekke qádem” orayınıń joybar menedjeri A.Baltabaevlar qatnastı.
Ushırasıw dawamında universitettiń oqıw isleri boyınsha prorektorı O.Dúysenbaev shıǵıp sóylep, mámleket basshısınıń tiyisli qararlarınıń orınlanıwı sheńberinde jaslardı zamanagóy kásip-ónerlerge baǵdarlaw, olardıń bántligin támiyinlew hám pitkeriwshilerdi miynet bazarı talaplarına sáykes, básekige shıdamlı qánige sıpatında tayarlaw máselelerine ayrıqsha toqtap ótti.
Sonday-aq, student-jaslar ushın óndirislik kárxanalar hám shólkemlerde haqı tólenetuǵın ámeliyatlardı shólkemlestiriw, ámeliy kónlikpelerdi bekkemlew hám oqıw procesinde-aq kásiplik mamanlıǵın arttırıw imkaniyatları jaratılıp atırǵanı haqqında tolıq maǵlıwmat berdi.
Ilaj dawamında miymanlar tárepinen jaslar isbilermenligin rawajlandırıw, startap joybarlardı qollap-quwatlaw, pitkeriwshilerdi jumıs penen támiyinlew mexanizmlerin jetilistiriw hám “Keleshekke qádem” baǵdarlaması sheńberinde jaratılıp atırǵan imkaniyatlar haqqında tolıq maǵlıwmatlar berildi.
Student-jaslar ózlerin qızıqtırǵan sorawlarǵa juwap aldı.

Qaraqalpaqstan xabar agentligi