Turizm komiteti baslıǵınıń orınbasarı Sanjar Tojiev “Turkish Airlines” aviakompaniyasınıń Tashkenttegi wákilxanasınıń basshısı Huseyn Guzel menen ushırastı.
Sóylesiwler dawamında Túrkiya milliy aviakompaniyasınıń wákillerine mámleketimizde turizm tarawında ámelge asırılıp atırǵan reformalar, sonıń ishinde, infrastrukturanı rawajlandırıw, transport-logistika imkaniyatların keńeytiw hám turizm xızmetleriniń sapasın arttırıw boyınsha alıp barılıp atırǵan jumıslar haqqında maǵlıwmat berildi. Sırt elli miymanlardıń sanı artıp atırǵanı, sonday-aq, aviakompaniya elimizdiń turizm tarawındaǵı potencialın xalıqaralıq maydanda úgit-násiyatlawǵa múnásip úles qosıp kiyatırǵanı ayrıqsha atap ótildi.
Ózbekstannıń tariyxıy-mádeniy miyrası, zıyarat, gastronomiyalıq, ekologiyalıq hám MICE turizm tarawındaǵı potencialın Evropa, atap aytqanda, Germaniya, Skandinaviya mámleketleri, Greciya hám AQShta úgit-násiyatlaw boyınsha birgeliktegi PR -kampaniyalar ótkeriw imkaniyatları dodalandı.
Ushırasıw juwmaǵında turizm tarawın turaqlı rawajlandırıw, mámleketimizdiń xalıqaralıq maydandaǵı abırayın bekkemlew hám sırt elli turistlerdiń aǵımın arttırıwǵa qaratılǵan strategiyalıq sheriklikti bunnan bılay da keńeytiw haqqında kelisimge erisildi.

Aziza ALIMOVA, ÓzA