ÓzLiDeP Xojeli rayonlıq Keńesiniń deputatları hám jámiyetlik shólkemlerdiń wákilleri qatnasıwında sawda-sanaat palatası rayonlıq bóliminiń esabatı tıńlandı. Májiliste rayonda isbilermenlikti qollap-quwatlaw, jańa jumıs orınların jaratıw hám xalıqtıń bántligin támiyinlew boyınsha 2025-jılda ámelge asırılǵan jumıslar haqqında maǵlıwmat berildi.
Málim etilgenindey, búgingi kúnde rayonda 3236 isbilermenlik subekti jumıs alıp barmaqta. Sonnan 1 mıń 589 i kishi biznes subektleri, 1 mıń 647 si jeke tártiptegi isbilermenler bolıp tabıladı. Tarawlar kesiminde sanaatta 284, awıl xojalıǵında 209, qurılıs tarawında 141, sawda hám xızmet kórsetiw tarawında 955 subekt jumıs alıp barmaqta. Ásirese, sawda hám xızmet kórsetiw baǵdarındaǵı belsendilik xalıqtıń bántligin támiyinlewde áhmiyetli orın iyelemekte.
2025-jıl dawamında 329 jańa isbilermenlik subekti shólkemlestirilgen bolıp, sonnan 117 i kishi biznes, 209 ı jeke tártiptegi isbilermen sıpatında dizimnen ótken. Bul bolsa rayonda isbilermenlik ortalıǵınıń turaqlı saqlanıp atırǵanın kórsetedi. Jıl dawamında isbilermenlerge 1357 jaǵdayda xızmet kórsetilgen. Sonıń ishinde, 1134 puqaraǵa ózin-ózi bánt etiw hám biznes baslaw boyınsha ámeliy járdem berilgen, 223 jaǵdayda biznes-reje islep shıǵıw, aukcion sawdalarında qatnasıw, buxgalteriyalıq hám statistikalıq esabatlardı tapsırıw boyınsha járdem berilgen.
Hayal-qızlardı isbilermenlikke tartıw baǵdarında da belgili jumıslar ámelge asırılǵan. 93 hayal-qız “Bizneske birinshi qádem” baǵdarlaması tiykarında oqıtılıp, olarǵa isbilermenlik jumısın baslaw ushın ámeliy járdem kórsetilgen. Bul arqalı shańaraqlardıń dáramatın arttırıw hám bántlikti támiyinlewge úles qosılmaqta.
Májlis dawamında deputatlar esabat boyınsha anıq soraw hám usınıslar bildirdi. Atap aytqanda, turaqlı jumıs orınların jaratıw nátiyjeliligi, jaslardı kásipke baǵdarlaw nátiyjeleri, kishi biznesti finanslıq qollap-quwatlaw mexanizmleri sonday-aq, jeńilletilgen kreditler ajıratılıwında ashıq-aydınlıq máseleleri dodalandı. Sonday-aq, ayırım máhállelerde jumıssızlıq dárejesi joqarı ekeni, kásip-ónerge oqıtıw baǵdarlamaların miynet bazarınıń talaplarına beyimlestiriw zárúrligi de atap ótildi.
Dodalawlar juwmaǵında jańa jumıs orınların jaratıwdı sistemalı dawam ettiriw, jaslar hám hayal-qızlar isbilermenligin mánzilli qollap-quwatlaw, alıs aymaqlarda mikro biznesti rawajlandırıw ushın infrastrukturanı jaqsılaw, kredit alıw processlerin ápiwayılastırıw hám túsindiriw jumısların kúsheytiw sıyaqlı wazıypalar belgilep alındı. Deputatlar bul baǵdarlarda ámeliy nátiyjelerge erisiw hám aymaqlarda ushırasıp atırǵan áhmiyetli máselelerdi sheshiw boyınsha qadaǵalawdı dawam ettiretuǵının bildirdi.

Qaraqalpaqstan xabar agentligi