Ájiniyaz atındaǵı Nókis mámleketlik pedagogikalıq institutında ǵalaba xabar qurallarınıń wákilleri, jurnalistler hám blogerlerdiń qatnasıwında ashıq sáwbetlesiw bolıp ótti.
Ashıq sáwbetlesiwde instituttıń jaslar menen islesiw, ruwxıylıq hám aǵartıwshılıq bóliminiń baslıǵı A.Bazarbaev, Jaslar awqamı baslanǵısh shólkeminiń jetekshisi E.Qasımov hám basqa da juwapkerler jaslar menen islesiw hám ruwxıy-aǵartıwshılıq baǵdarında ámelge asırılıp atırǵan jumıslar haqqında maǵlıwmat berdi.
Atap ótilgenindey, bıyılǵı oqıw jılında institutta ruwxıy-aǵartıwshılıq jumıslar sistemalı túrde jolǵa qoyılıp, jaslardı hár tárepleme jetik, Watanǵa sadıq, erkin pikirleytuǵın hám joqarı mánawiyatlı etip tárbiyalaw baslı maqset etip belgilendi.
Hár hápteniń piyshembi kúni «Profilaktika kúni» sıpatında belgilenip, tiyisli taraw wákilleri menen birgelikte diniy ekstremizm, terrorizm, korrupciya, adam sawdası, náshebentlik hám basqa unamsız illetlerdiń aldın alıwǵa baǵdarlanǵan úgit-násiyat ilajları ótkerilmekte. Atap aytqanda, 2025-jıl dawamında 600 den aslam, al 2026-jıldıń yanvar-fevral aylarında 180 nen aslam ruwxıy-aǵartıwshılıq ilajları shólkemlestirildi.
Institutta belgili shayır hám jazıwshılar menen 13 márte dóretiwshilik ushırasıw, Áliysher Nawayı, Zahiriddin Muhammed Babur, Ámir Temur, Ájiniyaz Qosıbay ulı, Berdaq Ǵarǵabay ulı sıyaqlı ullı tulǵalardıń ómiri hám dóretiwshiligine baǵıshlanǵan ádebiy kesheler shólkemlestirildi. Sonday-aq, studentlerdiń teatr hám muzeylerge turaqlı túrde barıwı jolǵa qoyılǵan.
Házirgi waqıtta institutta ulıwma 82 dógerek hám klub jumıs alıp barıp atırǵan bolıp, olarǵa ulıwma 6727 student qamtıp alınǵan. Sonnan, 32 pán, 16 sport, 22 ruwxıy-aǵartıwshılıq, 10 ónermentshilik baǵdarındaǵı dógerekler, «Tumaris» qosıq hám ayaq-oyın xalıq ansambli, «Sıy perde», «Tarannum», «Baldáwren» ansamblleri, «Turan» komandası, «Ziyalı jaslar» hám «Debat» intellektuallıq klubı qábiletli, bilimli, ziyrek studentlerdi birlestirmekte.
Studentler respublikalıq hám xalıqaralıq kólemdegi tańlaw hám jarıslarda belsene qatnasıp, sonnan 75 student xalıqaralıq, 301 student respublikalıq kólemde jeńimpaz boldı. Al, instituttıń sport klubı tárepinen 12 túrdegi sport baǵdarlarında shınıǵıwlar jolǵa qoyılǵan. 630 student, sonıń ishinde, 227 student-qız sport penen turaqlı shuǵıllanbaqta. Oqıw jılı dawamında «Universiada», «Bes baslama olimpiadası», «Studentler ligası», «Rektor kubogi» sıyaqlı sport jarısları hám salamatlıq ilajları shólkemlestirildi.
Prezidentimiz tárepinen alǵa qoyılǵan bes áhmiyetli baslama sheńberinde institutta 43 klub hám dógerek jumıs alıp barıp atırǵan bolıp, olarǵa 8404 student qamtıp alındı. Bul baǵdarlarda oqıw jılı dawamında 126 ilaj ótkerildi. Sonday-aq, studentler turaq jaylarında «Bes baslama» xanaları hám kitapxanalar shólkemlestirildi.
Prezident qararına muwapıq, Nókis qalasındaǵı hám Ellikqala rayonındaǵı 11 máhállede jámlespegen jaslar menen sistemalı jumıslar jolǵa qoyıldı. Atap aytqanda, aymaqlarda 29 sport jarısı, 36 úgit-násiyat ilajları shólkemlestirildi. Máhálle jasları instituttıń sport maydanshalar hám málimleme-resurs orayınan turaqlı paydalanbaqta.
Ashıq sáwbetlesiw dawamında qatnasıwshılar institut tárepinen ámelge asırılıp atırǵan áhmiyetli ilajlardı ǵalaba xabar qurallarında sáwlelendirip barıw, birge islesiw, respublikalıq áhmiyettegi ilajlarǵa qatnasıw, instituttı pitkergen jaslardıń bántligi hám basqa da máseleler boyınsha pikir-usınısların bildirip, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi.