Ózbekstan Respublikası Ministrler Kabineti “Sanlı markirovkalanǵan tovarlardıń háreketin baqlap barıw sistemasın jetilistiriwge qaratılǵan qosımsha ilajlar haqqında” qarar qabıl etti.
Oǵan muwapıq, 2026-jıl 1-iyunnen baslap Ózbekstan Respublikası hám birge islesiwshi mámleketler arasında suw hám salqın ishimliklerge baylanıslı sanlı markirovkalaw kodların óz-ara tán alıw engiziledi.
Qararǵa bola Salıq komiteti birge islesiwshi mámleketlerdiń sanlı markirovkalaw kodların Ózbekstan Respublikası aymaǵında tán alıw boyınsha wákillikli uyım esaplanadı.
2026-jıl 1-aprelge shekem sanlı markirovkalaw kodları maǵlıwmatları boyınsha málimleme almasıwǵa qoyılatuǵın talaplar belgilenedi hám olardıń qáwipsizligi támiyinlenedi. Onda bul talaplar sanlı markirovkalaw kodların óz-ara tán alıw hám tovarlardıń háreketin baqlap barıwda qatnasatuǵın barlıq mámleketlik uyımlar hám shólkemler ushın májbúriy bolıp esaplanadı.
Bir ay múddette Ózbekstan Respublikası aymaǵında óz-ara tán alınǵan sırt mámleketlerdiń sanlı markirovkalaw kodların elektron esap-faktura hám onlayn qadaǵalaw-kassa texnikasınıń kassa cheklerinde sáwlelendiriw imkaniyatı jaratıladı.
Hár jılı 15-yanvarǵa shekem sanlı markirovkanı óz-ara tán alıw boyınsha ámelge asırılıp atırǵan jumıslar procesi hám onıń nátiyjeleri haqqında Ministrler Kabinetine esabat usınıp barıw belgilengen.
Ózbekstan Respublikası Ekonomika hám qarjı ministrligi janındaǵı Bajıxana komiteti:
Ózbekstan Respublikası bajıxana shegarası arqalı alıp ótiletuǵın májbúriy sanlı markirovkalanıwı kerek bolǵan tovarlarda sanlı markirovkalaw kodlarınıń bar ekenligi qadaǵalanıwın;
tovarlardıń nızamsız aylanısınıń aldın alıw maqsetinde birge islesiwshi mámleketlerdiń bajıxana uyımları menen maǵlıwmat almasıwdıń jolǵa qoyılıwın támiyinleydi.
Qararǵa muwapıq:
“Asl belgisi” ónimlerdi markirovkalaw hám baqlap barıw milliy málimleme sistemasınıń operatorı sanlı markirovkalaw maǵlıwmatların qabıl etiw, qayta islew, saqlaw hám qorǵawdı támiyinleydi;
Ózbekstan Respublikası aymaǵında qáliplestiriletuǵın hám aylanısta bolatuǵın sanlı markirovka maǵlıwmatları Ózbekstan Respublikası aymaǵında jaylasqan data-oraylar sheńberinde saqlanıwı hám qayta isleniwi shárt;
tovarlardıń sanlı markirovkası haqqındaǵı maǵlıwmatlar sırt el mámleketlik uyımları hám basqa da shólkemlerge xalıqaralıq shártnamalar tiykarında hámde málimleme qáwipsizligi talaplarına ámel etken halda jetkeriledi;
Ózbekstan Respublikası aymaǵında májbúriy sanlı markirovkalanıwı kerek bolǵan tovarlardı erkin aylanısqa shıǵarıwǵa tek ǵana “Asl belgisi” ónimlerdi markirovkalaw hám baqlap barıw milliy málimleme sistemasında olarǵa engizilgen sanlı identifikaciya qurallarınıń haqıyqıylıǵı tastıyıqlanǵannan keyin jol qoyıladı.
Maǵlıwmat ornında, aldınıraq Ózbekstan Respublikası Prezidentiniń “Májbúriy sanlı markirovkalaw sistemasınıń nátiyjeliligin arttırıwǵa qaratılǵan qosımsha ilajlar haqqında”ǵı 2025-jıl 23-maydaǵı PQ-190-sanlı qararına muwapıq tómendegiler:
qáwipti tallaw sistemasında májbúriy sanlı markirovkalaw qaǵıydaların buzıw jaǵdayları salıq qáwpi dárejesin joqarı dep bahalaw ushın tiykar bolıwı;
májbúriy sanlı markirovkalanatuǵın ónimlerdi realizaciyalawda markirovka kodı biriktirilmegen elektron esap-fakturanı rásmiylestiriwge jol qoyılmawı;
markirovka kodı kirgizilgennen soń onlayn qadaǵalaw-kassa texnikasınıń kassa cheki qáliplestiriliwi;
aldın paydalanılǵan markirovka kodları kirgizilgende, onlayn qadaǵalaw-kassa texnikasınıń kassa cheki qáliplesiwine jol qoymaw belgilengen edi.

ÓzA