Beruniy rayonı prokuraturası, Májbúriy orınlaw byurosı rayonlıq bóliminiń baslaması menen erjetpegen perzentleriniń támiynatına juwapker aliment tólewshilerde tólem mádeniyatın arttırıw, olardı jumıs penen támiyinlew, aliment tólemlerine baylanıslı huqıqıy másláhátler hám olardıń densawlıǵın saqlawǵa qaratılǵan ilaj ótkerildi.
Ilajda shıǵıp sóylegenler, sud qararlarına bola aliment tólewshi shaxslardıń sanı ótken jılǵa salıstırǵanda 100 ge artqanlıǵı atap ótilip, aliment tólemegen shaxslarǵa keskin ilajlar kóriliwi boyınsha huqıqıy túsinik berildi.
Usı kúni jumıssız aliment tólewshilerdi jumıs penen támiyinlew maqsetinde miynet yarmarkası ótkerilip, 13 qarızdarǵa jumısqa jaylasıw ushın jollama berildi. Bunnan tısqarı, 9 aliment tólewshi medicinalıq tekseriwden ótkerildi hám 11 puqaranıń aliment óndiriwge baylanıslı múrájatı qabıl etildi.
Sonday-aq, ilaj sheńberinde jınayat isleri boyınsha Beruniy rayonı sudı sudyası I.Allaniyazov tárepinen kóshpeli sud májilisi ótkerilip, onda aliment tólewden turaqlı túrde bas tartıp kelgen 5 shaxstıń juwapkershilik máselesi sheshildi.

Qaraqalpaqstan xabar agentligi