Regionımızdıń investiciyalıq, turizm hám eksport potencialı menen tanısıw maqsetinde sırt mámleketler elshixanalarınıń diplomatları hám xalıqaralıq shólkemlerdiń wákilleri respublikamızǵa kelgen edi.
Dáslep miymanlarǵa Qaraqalpaqstanda jaratılǵan sharayatlar hám qolaylı imkaniyatlar keń túrde tanıstırıldı. Bunnan soń olar iri investiciyalıq joybarlar tiykarında kárxanalarda alıp barılıp atırǵan jumıslardı barıp kórdi.
Sońınan sırt elli miymanlar I.V.Savickiy atındaǵı Qaraqalpaqstan mámleketlik kórkem óner muzeyinde bolıp, «Sahradaǵı luvr» eksponatları menen jaqınnan tanıstı.
Aralboyı xalıqaralıq innovaciya orayında Aral teńizi qurıwınıń aqıbetlerin jumsartıw baǵdarında ámelge asırılıp atırǵan joybarlardı kózden ótkerdi.
Bunnan soń ulıwma bahası 67 mln. dollar bolǵan, jılına 50 mıń tonnaǵa shekem ónim islep shıǵarıw quwatlıǵına iye «KARAKALPAK BASALTWOOL» kárxanasınıń jumısın barıp kórdi.
Sonday-aq, miymanlar ulıwma bahası 48,5 mln. dollar bolǵan, jılına 18 mıń tonna iyirilgen jip islep shıǵarıw quwatlıǵına iye hám 400 jumıs ornın jaratatuǵın «Nókis SSP Texnopark» kárxanası turmısı menen jaqınnan tanıstı.
Elimizdiń eksport potencialına úles qosatuǵın jáne bir kárxana – jılına 640 mıń metr radiator ónimlerin islep shıǵarıw quwatlıǵına iye bolatuǵın «Osten Technologies» kárxanası jumısları da barıp kórildi.

Qaraqalpaqstan xabar agentligi