Nókis rayonındaǵı “Samanbay” awıl puqaralar jıyını aymaǵında xalıqtıń abadanlıǵın arttırıw hám awıl xojalıǵı nátiyjeliligin kúsheytiwge qaratılǵan iri joybarlar ámelge asırılmaqta.
Usı baslama sheńberinde xalıqtıń qıytaq jerleri hám awıl xojalıǵı eginlerin suwǵarıw sistemasın jaqsılaw maqsetinde “Islam rawajlanıw banki” hám “OPEK xalıqaralıq qorı” tárepinen jámi 4 milliard 256 million sum qarjı ajıratıldı.
Házirgi kúnde qurılıs jumısları jedel pátlerde alıp barılmaqta. Joybar sheńberinde “Ústirt trans” juwapkershiligi sheklengen jámiyeti tárepinen 5 kilometr lotok (beton salma) ornatıw rejelestirilgen bolıp, bul suwǵarıw sistemasınıń nátiyjeliligin sezilerli dárejede arttırıwǵa xızmet etedi.
Usı ámeliy jumıslar nátiyjesinde suw ısırapgershiliginiń aldı alınıp, qıytaq jerlerden únemli paydalanıw imkaniyatı keńeyedi, awıl xojalıǵı ónimdarlıǵı artıp xalıqtıń dáramatları kóbeyiwine tiykar jaratılıwı názerde tutılǵan.
Bunday infrastrukturalıq joybarlar aymaqtı kompleksli rawajlandırıw hám xalıqtıń turmıs dárejesin jaqsılawǵa baǵdarlanǵan.

Qaraqalpaqstan xabar agentligi