Nókis rayonınıń “Samanbay” awıl puqaralar jıyını aymaǵında xalıq ushın jáne bir áhmiyetli infrastrukturalıq joybar ámelge asırılmaqta.
Bul joybardı ámelge asırıw ushın aymaqtaǵı ishki jollardıń jaǵdayın jaqsılaw, xalıqqa qolaylı hám qáwipsiz háreketleniw sharayatın jaratıw maqsetinde qarjı ajıratıldı.
Bul joybar sheńberinde OPEK xalıqaralıq qorı tárepinen 8 milliard 600 million sum qarjı qaratılıp, jámi 15 kilometr ishki jollardı asfaltlaw rejelestirilgen.
Házirgi waqıtta qurılıs jumısları “”Adham Hamdam oil servis” juwapkershiligi sheklengen jámiyeti tárepinen alıp barılmaqta. Qánigeler tárepinen jol tiykarın tayarlaw, tegislew hám zamanagóy asfalt qaplamasın tósew jumısları basqıshpa-basqısh ámelge asırılmaqta.
Usı joybardı ámelge asırıw nátiyjesinde xalıq turmısında transport háreketi ushın qolaylı sharayat jaratıladı, mektep, baqsha hám medicina mákemelerine barıw ańsatlasadı, tez medicinalıq járdem hám basqa da xızmetlerdiń háreketi tezlesedi hám sonday-aq, aymaqtıń investiciyalıq tartımlılıǵı hám ekonomikalıq belsendiligi artadı.
Ishki jollardı asfaltlaw jumısları tek ǵana infrastrukturanı jaqsılaw emes, al xalıqtıń turmıs dárejesin arttırıw, awıllıq aymaqlardı zamanagóy kóriniske keltiriw jolındaǵı áhmiyetli qádem bolıp esaplanadı.

Qaraqalpaqstan xabar agentligi