ÓzLiDeP Qaraqalpaqstan Respublikası Keńesiniń baslaması menen Nókis jaslar texnoparkinde “Kreativ isbilermen jaslar” joybarı sheńberinde ilaj shólkemlestirildi. Onda Qaraqalpaqstan Respublikası Joqarǵı Keńesiniń komitet baslıǵı Sh. Otemisov, ÓzLiDeP Qaraqalpaqstan Respublikası Keńesiniń apparat baslıǵı A. Aybergenov hám partiyanıń Jaslar qanatı wákilleri qatnastı.
Ilaj dawamında partiya belsendileri hám deputatlar jaslardıń startap joybarları, innovaciyalıq qollanbaları hám tayar prototipleri menen jaqınnan tanıstı. Jaslar óz ideyaları arqalı zamanagóy isbilermenlik ortalıǵına sáykes bilim hám kónlikpelerin kórsetip, aymaqta innovaciyalıq ekosistema qáliplesip atırǵanın jáne bir márte dálilledi.
Usınılǵan joybarlar arasında ásirese suw resurslarınan aqılǵa uǵras paydalanıwǵa qaratılǵan “AQUA LOOP” startapı úlken qızıǵıwshılıq oyattı. Joybar avtorı Bibinur Bazarbaeva tárepinen islep shıǵılǵan bul mexanizm ıdıs juwıw, kir juwıw hám dushtan shıqqan suwdı jıynap, filtrlewden ótkergen halda hájetxana sistemasına jiberiw arqalı ishimlik suwın únemlew imkaniyatın beredi. Itibarlı tárepi sonda, bul sistema elektr energiyasız isleydi hám ekologiyalıq turaqlılıqtı támiyinlewge xızmet etedi.
Sonday-aq, ilajda plastikalıq shıǵındılardı qayta islew tiykarında “pufik” hám kreslolar islep shıǵarıw joybarı da tanıstırıldı. Bul baslama tek ǵana qorshaǵan ortalıqtı qorǵawǵa úles qosıp qoymastan, al arzan hám sapalı mebel islep shıǵarıw arqalı jańa jumıs orınların jaratıw imkaniyatın da beredi.
Ilaj qatnasıwshıları arasında Semyon Shuchkin tárepinen islep shıǵılǵan STuDy” platforması da ayrıqsha itibarǵa ılayıq boldı. Bul platforma jasalma intellekt tiykarında paydalanıwshınıń bilim dárejesi, sóylesiw tili hám bilimlendiriw abzallıqların esapqa alǵan halda avtomatikalıq túrde individual oqıw kursların qáliplestiredi. Bul bolsa qısqa waqıt ishinde nátiyjeli bilim alıw hám kónlikpelerdi rawajlandırıw imkaniyatın jaratadı.
Joybar komandası hár qıylı tańlawlarda belsene qatnasıp kelmeke. Atap aytqanda, Qaraqalpaqstan Respublikası Joqarǵı Keńesi tárepinen shólkemlestirilgen “Innovation Hack” tańlawında ekinshi orındı iyelep, 30 million sum muǵdarındaǵı aqshalay sıylıqqa iye bolǵanı olardıń potencialın jáne de kórsetti.
Ilaj dawamında deputatlar jas isbilermenler ushın jaratılǵan jeńillikler, grant baǵdarlamaları hám ámeliy qollap-quwatlaw mexanizmleri haqqında tolıq maǵlıwmat berdi. Jaslar bolsa óz-ara tájiriybe almasıw, birge islesiw baylanısların jolǵa qoyıw hám keleshekte birgeliktegi joybarlardı ámelge asırıw boyınsha kelisimlerge eristi.
Búgingi kúnde ÓzLiDeP tárepinen jaslardıń isbilermenlik baslamaların qollap-quwatlaw, innovaciyalıq ideyaların ámeliyatqa engiziw hám olardı ekonomikalıq belsendilikke keńnen tartıwǵa qaratılǵan jumıslar turaqlı dawam etpekte.
“Kreativ isbilermen jaslar” joybarı, mine, usı háreketlerdiń ámeliy kórinisi bolıp, jaslardıń intellektuallıq potencialı hám baslamaların júzege shıǵarıwda áhmiyetli platforma wazıypasın atqarmaqta.

Qaraqalpaqstan xabar agentligi