Ispaniyanıń “Europa Press” málimleme agentliginde Ózbekstanǵa baǵıshlanǵan maqala basıp shıǵarıldı. Onda “B-Travel” xalıqaralıq turistlik kórgizbesinde mámleketimiz tiykarǵı birge islesiwshi hám húrmetli miyman sıpatında qatnasatuǵını málim etilgen.
Derekke bola, usı jılı 20-22-mart kúnleri Barselona qalasındaǵı Fira de Barcelona kompleksiniń “Montjuïc” maydanında ótkeriletuǵın turistlik kórgizbede Ózbekstan delegaciyası bas sherik hám húrmetli miyman sıpatında qatnasadı.
Maqalada atap ótiliwinshe, sońǵı jılları mámleket Ullı jipek jolındaǵı bay tariyxıy miyrası, sonıń ishinde, dúnyanıń eń áyyemgi qalalarınan biri bolǵan Samarqand hám zamanagóy Tashkent sebepli ǵalabalıq turistlik baǵdarlardan birine aylanbaqta. Sonday-aq, Ózbekstandaǵı islam arxitekturası estelikleri hám siyrek ushırasatuǵın dıqqatqa ılayıq orınlar ispaniyalı turistlerde úlken qızıǵıwshılıq oyatpaqta.
Ózbekstannıń kórgizbede qatnasıwı turizm tarawı qánigeleri, agentlikler hám turoperatorlar ushın jańa birge islesiw imkaniyatların jaratatuǵını atap ótilgen.
“B-Travel” prezidenti Marti Sarrate Barselonada keń jámiyetshilikke ózine tán hám tań qaldıratuǵın baǵdarlardı usınıw ústinde jumıs alıp barılıp atırǵanın atap ótip, Ózbekstannıń birge islesiwshi mámleket sıpatında qatnasıwı kórgizbe baǵdarlamasın jáne de bayıtatuǵının atap ótti.
Qánige Ózbekstan húkimeti hám turizm tarawı wákillerine isenim ushın minnetdarshılıq bildirip, bul ilaj eki mámleket arasındaǵı turistlik baylanıslardı jańa basqıshqa alıp shıǵatuǵınına isenim bildirdi.

B.XUDOYBERDIEV, ÓzA