Búgin kóshelerde juwırıp atırǵan jaslardı, azanǵı dene shınıqtırıw menen shuǵıllanıp atırǵan adamlardı yamasa sport maydanlarında top oynap atırǵan balalardı kórsek, bir haqıyqattı ańlaymız: sport turmısımızdıń ajıralmas bólegi. Sebebi, salamat jámiyetti salamat insanlarsız kóz aldımızǵa keltirip bolmaydı.
Medicina qánigeleriniń atap ótiwinshe, az háreketli turmıs tárizi kóplegen keselliklerdiń kelip shıǵıwına sebep boladı. Kompyuter hám telefon aldında uzaq waqıt otırıw, fizikalıq belsendiliktiń jetispewi organizmniń jumısına unamsız tásir kórsetedi. Sport bolsa bunıń kerisi – ol insan denesin shınıqtıradı, júrek-qan tamır sistemasın bekkemleydi, immunitetti arttıradı hám ruwxıy jaǵdaydı jaqsılaydı.
Biraq sporttıń áhmiyeti tek ǵana densawlıq penen sheklenbeydi. Ol insan xarakterin qáliplestiredi. Shınıǵıwlar dawamında insan sabırlı bolıwdı, maqsetke umtılıwdı, sabırlılıqtı úyrenedi. Sport maydanı – bul ómir mektebi. Onda hár bir jeńilis tájiriybe, hár bir jeńis bolsa miynet nátiyjesi sıpatında qabıl etiledi.
Ásirese, jaslardıń turmısında sporttıń ornı sheksiz. Sport penen shuǵıllanǵan bala waqtın mazmunlı ótkeredi, zıyanlı ádetlerden uzaq boladı hám óz aldına anıq maqset qoyıwdı úyrenedi. Búgin sportqa berilgen itibar – erteńgi salamat áwladtıń tiykarı.
Solay eken, sporttı tek ǵana shınıǵıw yamasa minnetleme sıpatında emes, al turmıs tárizi sıpatında qabıl etiwimiz kerek. Hár kúni keminde bir neshe minuttı fizikalıq belsendilik ushın ajıratıw – bul óz salamatlıǵımızǵa islengen eń úlken investiciya bolıp esaplanadı. Sebebi sport – salamat turmıstıń bekkem girewi.

Shoira Xaytbaeva,
Berdaq atındaǵı QMU Qaraqalpaq filologiyası hám jurnalistika fakulteti studenti.
Qaraqalpaqstan xabar agentligi.