Ómirde durıs kásip tańlaw tabıslı keleshektiń girewi. Sebebi, insannıń kópshilik waqtı jumıs procesinde ótedi. Sol sebepli de insan ózi ushın súyikli ónerdi úyreniwi, ózi unatqan kásip penen shuǵıllanıwı kerek.
Xojeli rayonındaǵı jumıssız hám bánt bolmaǵan puqaralardıń, ásirese, hayal-qızlar hám jaslardıń bántligine járdemlesiw, olardı miynet bazarındaǵı kásiplerge baǵdarlaw maqsetinde rayonda jaylasqan 5-sanlı Balalar muzıka hám kórkem óner mektebinde bos jumıs orınları miynet yarmarkası shólkemlestirildi.
Miynet yarmarkasınıń ashılıwında shıǵıp sóylegenler elimizde xalıqtıń mashqalaların sheshiw, ásirese, bántligin támiyinlew, puqaralardıń turaqlı dáramat deregin qáliplestiriw baǵdarında keń kólemli jumıslar alıp barılıp atırǵanın atap ótti.
Miynet yarmarkasında rayonlardaǵı 27 jumıs beriwshi kárxana hám shólkemler ózleriniń 60 tan aslam bos (vakant) jumıs orınları menen qatnaspaqta. Kárxana hám shólkemlerden kelgen wákiller ózlerinde bar bolǵan bos jumıs orınları haqqında tolıq maǵlıwmat berdi.
Miynet yarmarkası dawamında 50 ge shamalas puqaralar qatnastı. Dizimnen ótkenlerdiń kópshiligin aliment tóleytuǵın, probaciya esabında turatuǵın shaxslar hám miynet migrantları quraydı. Olar ózlerine say bolǵan jumıs orınları menen tanıstı. Nátiyjede, yarmarka dawamında 8 puqara menen jumıs beriwshiler arasında miynet shártnamalarına qol qoyıldı. Bunnan tısqarı, 15 puqaraǵa jeńillikli kredit alıw boyınsha másláhát berildi.
Sonday-aq, bir qansha puqaralarǵa miynet bazarında talap joqarı bolǵan kásiplerge tayarlaw, qayta tayarlaw ushın jollamalar berildi.
Bunday yarmarkalardıń turaqlı shólkemlestiriliwi, jumıssız bolǵan puqaralarımız ushın ózlerine múnásip jumıs ornın tabıwda úlken áhmietke iye.

Qaraqalpaqstan xabar agentligi