I.V.Savickiy muzeyi kollekciyasında dástúriy qaraqalpaq qız-kelinshekleriniń bezeniw buyımı – shártúyme saqlanadı. Ol gúmisten islengen bolıp, tórt múyeshli kóriniste, qızıl yaqut, firuza hám reńli shiyshe menen bezelgen. Geyde bezew kompoziciyası shınjırlı bezewler menen tolıqtırıladı, olar háreketleniw waqtında jaǵımlı sesler úylesimin payda etedi.
Bezew buyımınıń atı “shar” sózi menen baylanıslı bolıp, bul “tórt tárep” degen mánisti ańlatadı hám bul dúnyanıń payda bolıwına tiyisli áyyemgi qıyallardı sáwlelendiredi. Shartúyme dúnyanıń tórt tárepi simvolın sáwlelendiredi hám bir pútinlikti ańlatadı. Qaptalı hám tómeni kóbinese japıraqlar menen bezelip, bul buyımnıń qorǵaw wazıypasın kúsheytedi.
Shartúyme – ápiwayı kiyim bezegi emes, ol mártebe belgisi, qorǵawshı tumar hám xalıqtıń dúnyaqarasın sáwlelendiriwshi buyım bolıp, ondaǵı hár bir tas hám hár bir forma óz aldına mániske iye.

Qaraqalpaqstan xabar agentligi.