Nókis qalasındaǵı 23-sanlı ulıwma orta bilim beriw mektebinde inklyuziv bilimlendiriw baǵdarında áhmiyetli qádem taslandı. Atap aytqanda, oqıw dárgayında inklyuziv klasslar shólkemlestirilip, ayrıqsha bilimlendiriw mútájligi bar oqıwshılar ushın zamanagóy hám qolaylı sharayatlar jaratıldı.
– Ózbekstan Respublikası Ministrler Kabinetiniń 2020-jıl 13-oktyabrdegi 638-sanlı qararına tiykarlanıp, mektepte 4 klass ushın 4 arnawlı pedagog biriktirilip, 4 oqıwshı inklyuziv bilimlendiriw procesine tartıldı, – deydi mektep direktorı Anora Tórenova. – «Inklyuziv klasslarda balalarǵa individuallıq qatnas tiykarında bilim berilmekte. Hár bir oqıwshınıń imkaniyatları hám talapları esapqa alınıp, sabaqlar zamanagóy metodikalar tiykarında shólkemlestirilgen. Muǵallimler arnawlı metodikalar hám beyimlestirilgen baǵdarlamalar tiykarında sabaqların alıp barıp, hár bir oqıwshınıń qábileti hám zárúrliginen kelip shıǵıp bilimlendiriw procesin shólkemlestirmekte. Bul bolsa balalardıń bilim alıwǵa bolǵan qızıǵıwshılıǵın arttırıwǵa, olardıń jámiyetke tabıslı integraciyalasıwına xızmet etpekte.
Usılar menen birge, mektepte bilimlendiriwdiń sapasın bunnan bılay da arttırıw maqsetinde zamanagóy elektron taxtalar da ornatılǵan. Jańa texnologiyalar járdeminde muǵallimler sabaq procesin interaktiv usılda shólkemlestirip, temalardı vizual hám ámeliy kóriniste túsindiriw imkaniyatına iye bolmaqta. Elektron taxtalar arqalı prezentaciyalar, videosabaqlar, animaciyalar hám hár qıylı didaktikalıq materiallardan nátiyjeli paydalanılmaqta.
Inklyuziv bilimlendiriw – bul tek ǵana bilimlendiriw procesi emes, al, mehir, itibar hám teń imkaniyatlar ortalıǵı ekenin atap ótiw kerek. 23-sanlı mektep jámááti tárepinen jaratılıp atırǵan sharayatlar balalardıń ózine bolǵan isenimin bekkemlew, olardıń sociallıq belsendiligin arttırıw hám sapalı bilim alıwın támiyinlewge qaratılǵan.
Bul baslama respublikamızda inklyuziv bilimlendiriwdi rawajlandırıw baǵdarındaǵı ámeliy jumıslardıń ayqın úlgisi bolıp, keleshekte basqa da bilimlendiriw orınları ushın da nátiyjeli tájiriybe wazıypasın atqarıwı kútilmekte.

Biybisara Jartıbaeva,
Berdaq atındaǵı QMUdıń 2-kurs magistrantı
Qaraqalpaqstan xabar agentligi