Sud-huqıq tarawında puqaralardıń múrájatların tikkeley tıńlaw, olarǵa huqıqıy másláhátler beriw hám mashqalaların sheshiwge járdemlesiw – mámleketlik uyımlardıń tiykarǵı wazıypalarınan biri bolıp esaplanadı. Usı tiykarda, Qaraqalpaqstan Respublikası sudı tárepinen jolǵa qoyılǵan onlayn qabıllawlar puqaralar ushın úlken qolaylıq jaratıp atırǵanın ayrıqsha atap ótiw zárúr.
Sonıń ishinde, fizikalıq jaqtan sud imaratına barıw imkaniyatı bolmaǵan yamasa alıs aymaqta jasaytuǵın puqaralar onlayn sóylesiw arqalı óz mashqalasın ańsat jetkeriw imkaniyatına iye bolmaqta. Bul bolsa, sud sisteması xızmetkerleriniń xalıqtıń ishine kirip barıwı, adamlardıń dártin tıńlawı hám turmıslıq mashqalalardı ádillik tiykarında sheshiwge umtılıwınan dárek beredi.
Atap aytqanda, Qaraqalpaqstan Respublikası sudlarınıń basshıları Qońırat, Moynaq hám Qanlıkól rayonları puqaraları ushın onlayn túrde qabıllaw ótkerip, onda aymaq turınlarınıń sud-huqıq tarawına baylanıslı múrájatları tıńlandı.
Videokonferenc-baylanıs rejiminde shólkemlestirilgen onlayn qabıllawda puqaralar ózlerin qızıqtırǵan huqıqıy máseleler, sonıń ishinde, kredit, shańaraqlıq tartıslar, qarız óndiriw, is haqı óndiriw, sud qararlarınıń orınlawına baylanıslı mashqalalar boyınsha ózleriniń múrájatlar jolladı.
Sud baslıqları tárepinen hár bir múrájat ayrıqsha kórip shıǵılıp, puqaralarǵa nızamshılıq sheńberinde tiykarlanǵan túsinikler berildi. Ayırım jaǵdaylarda múrájat etiwge tiykar bolǵan jaǵdaylar boyınsha sud hújjetleri qayta úyreniliwi hám tiyisli uyımlarǵa ótinish xatı jiberiliwi belgilendi.
Onlayn qabıllaw procesinde puqaralardıń huqıqıy sawatlılıǵın arttırıw maqsetinde, olarǵa ámeldegi milliy nızamshılıq, puqaralıq-processual hám hákimshilik is júrgiziw tártipleri, múrájat etiw huqıqları haqqında qosımsha maǵlıwmatlar da berildi.

Adilbay Orazov,
Qaraqalpaqstan xabar agentligi sholıwshısı