Ózbekstan Respublikası Prezidentiniń “Startaplardı qollap-quwatlawdıń kompleksli ekosistemasın engiziw ilajları haqqında”ǵı qararına muwapıq, 2026-jıldan baslap hár jılı jaslardıń eń jaqsı biznes hám startap joybarların anıqlaw hám xoshametlew boyınsha “Jas isbilermenler” chempionatı ótkeriledi.
Oǵan bola, chempionatta qatnasqan 100 ge shekemgi biznes hám startap joybarlardıń hár birine Jaslar isbilermenligin rawajlandırıw mámleketlik maqsetli qorı hám “Yoshlar ventures” venchur qorınıń qarjıları esabınan 1 milliard sumǵa shekem investiciya kirgiziledi.
Jaslar isbilermenligin rawajlandırıw mámleketlik maqsetli qorına ajıratılǵan qarjılar sheńberinde startap hám biznes joybarlardı brendke aylandırıw ushın finanslıq hám marketing xızmetleri boyınsha ekspertlerdiń bazalıq esaplaw muǵdarınıń 100 esesine shekemgi muǵdardaǵı qárejetleri tólep beriledi.
Jaslar isbilermenligin rawajlandırıw mámleketlik maqsetli qorı keńesi chempionat jeńimpazların mámleketlik sıylıqlar, “Faol tadbirkor” hám “Ózbekiston belgisi” kókirek belgilerine usınıs etiw ushın wákillikli uyımlarǵa usınıslar kirgizedi.
2026-jıl 1-aprelden baslap “Sanlı startaplar” baǵdarlamasında qatnasıwshı startap joybarlarǵa IT-park rezidenti statusı beriledi hám olarǵa nızamshılıqta belgilengen minimal eksport kórsetkishleriniń talabısız tiyisli jeńillik hám preferenciyalardan paydalanıwǵa ruqsat beriledi.
2026-jıl 1-aprelden baslap Startap ekosistemasınıń birden-bir elektron platformasında dizimnen ótken startap ekosistema qatnasıwshılarına:
a) juwapker shólkemler tárepinen tiyisli tarawlarǵa baylanıslı startap joybarlar boyınsha tómendegi qárejetler qaplap beriledi:
tiyisli baǵdarlardaǵı oqıw kurslarında oqıw hám sertifikat alıw jáne abıraylı akseleraciya hám inkubaciya baǵdarlamalarında qatnasıw menen baylanıslı qárejetlerdiń 50 procentine shekemgi, biraq 20 mıń AQSh dolları ekvivalentinen aspaǵan muǵdarda;
patentlew hámde intellektuallıq iskerlik nátiyjeleri hám sawda belgilerin dizimnen ótkeriw;
b) Jaslar isbilermenligin rawajlandırıw mámleketlik maqsetli qorı esabınan jaslardıń startap joybarları boyınsha tómendegiler ajıratıladı:
startap studiyalar, inkubaciya hám akseleraciya orayların shólkemlestiriw ushın jılına 20 ǵa shekem joybarǵa 1 jıl jeńilletilgen dáwir menen 5 jılǵa shekemgi múddetke 5 milliard sumǵa shekem procentsiz qarız (ssuda);
jergilikli inkubaciya yamasa akseleraciya baǵdarlamalarında qatnasıw menen baylanıslı vznos tólemleri ushın ayma-ay ajıratılatuǵın hám ulıwma muǵdarı bazalıq esaplaw muǵdarınıń 100 esesinen aspaǵan grant.
2026-jıl 1-aprelden baslap aymaqlarda tikkeley Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası hákimleriniń basshılıǵında Startaplar klubı shólkemlestiriledi hám olarǵa startap intakerleri menen hár ayda ushırasıw, mámleketlik uyımlar menen júzege kelgen máseleleri boyınsha ámeliy járdem kórsetiw jáne usı aymaqtaǵı iri isbilermenlik subektlerin startap joybarlarǵa biriktiriw wazıypaları júklenedi.
2026-jıldan baslap hár jılı “Startap ekspo” kórgizbesiniń ótkeriliwi jolǵa qoyıladı.

ÓzA