Berdaq atındaǵı Qaraqalpaq mámleketlik universiteti Yuridika fakultetinde ǵalaba xabar qurallarınıń wákilleri, tyutorlar hám student-jaslar qatnasıwında “Nızam ústinligi hám insan huqıqları” atamasında media-tur shólkemlestirildi.
Media-tur procesinde qatnasıwshılar mámleketimizde huqıqıy mámleket hám puqaralıq jámiyet qurıw jolında ámelge asırılıp atırǵan keń kólemli reformalar, sud-huqıq tarawındaǵı jańalanıwlar, insan huqıqların qorǵawdıń xalıqaralıq standartları haqqında maǵlıwmatlarǵa iye boldı.
Dáslep qatnasıwshılar fakultettiń zamanagóy úskeneler menen támiyinlengen kriminalistika laboratoriyasında tergew processlerinde qollanılatuǵın texnikalıq qurallar, dálillerdi anıqlaw hám saqlaw usılları, kriminalistikalıq ekspertiza túrleri menen jaqınnan tanıstı. Qánigeler tárepinen jınayıy hádiyselerdi ashıwda dálillerdi ilimiy tallawdıń áhmiyeti, kriminalistikalıq texnologiyalardıń roli hám zaman talaplarına say innovaciyalıq usıllar haqqında atap ótildi.
Student-jaslarǵa barmaq izlerin anıqlaw, mikroobektler menen islew, jazba hújjetlerdi ekspertizadan ótkeriw, foto hám video dáliller menen islew sıyaqlı ámeliy kónlikpeler boyınsha kórgizbeler kórsetildi. Ámeliy mısallar arqalı jaslar ózleriniń teoriyalıq bilimlerin bekkemlep, keleshekte huqıq qorǵaw uyımlarında islew ushın kerek bolatuǵın ámeliy tájiriybe elementlerin úyreniw imkaniyatına iye boldı.
– Fakultetimizde derlik 50 jıldan berli yurist kadrlar tayarlap kelinbekte, – deydi Yuridika fakultetiniń dekanı, yuridika ilimleri doktorı, professor Farxad Qutlımuratov. – Tálimniń kúndizgi, sırtqı, keshki, aralıqtan oqıtıw, ekinshi qánigelik túrleri shólkemlestirilgen. Bunnan tısqarı 5 qánigelik boyınsha magistratura, tayanısh doktorantura hám qánigelestirilgen dissertaciya keńesi bar. Fakultetimizde 4 kafedrada yurisprudenciya tálim baǵdarı, siyasattanıw hám ruwxıylıq tiykarları boyınsha 3 mıń 119 studentke 100 ge shamalas professor-oqıtıwshılar sabaq berip kelmekte. Studentlerdiń teoriyalıq bilimlerin ámeliyatta jáne de bekkemlew maqsetinde bolajaq notariuslar, korrupciyaǵa qarsı gúresiw, «Street low», jas kriminalistler sıyaqlı 14 klub hám dógerekler shólkemlestirilgen bolıp, óz tarawınıń maman qánigeleri usı jerde tájiriybeleri menen bólisedi.
Bunnan soń media-tur qatnasıwshıları fakultette shólkemlestirilgen oqıw sud zalına barıp, sud processleriniń qalay shólkemlestiriliwi hám ámelge asırılıwı menen tanıstı. Sud májilisiniń strukturası, sudyalardıń qarar qabıl etiw principleri, prokuror hám advokatlardıń processual roli, sonday-aq, sud etikası haqqında tolıq túsinikler berildi.
Sonday-aq, Korrupciyaǵa qarsı gúresiw kovorking orayınıń jumısı menen tanıstırıldı. Orayda jaslar arasında korrupciyaǵa qarsı immunitetti qáliplestiriw, ádillik principlerin sińdiriw boyınsha alıp barılıp atırǵan jumıslar haqqında maǵlıwmatlar berildi.
-Búgingi media-turda qatnasıw men ushın ámeliy tájiriybe boldı, – deydi student Azamat Qonısbaev. – Huqıqıy bilimlerimiz arttı, jańadan qabıl etilip atırǵan nızam hám normativlik-huqıqıy hújjetler haqqında maǵlıwmatlarǵa iye boldıq.
Ilaj sońında qatnasıwshılar arasında pikir alısıw bolıp, nızam ústinligin támiyinlewde hár bir puqaranıń huqıqıy bilimge iye bolıwı, nızamlarǵa húrmet penen qaraw ruwxında tárbiyalanıwınıń áhmiyeti atap ótildi. Jaslar tárepinen huqıqıy bilimlerdi keńnen úgit-násiyatlaw, huqıqıy mádeniyattı kóteriw hám media-turlar menen ámeliy ilajlardı turaqlı shólkemlestiriw boyınsha bir qatar baslamalar usınıs etildi.
Media-tur jaslardıń huqıqıy sanasın rawajlandırıw, olardı nızamlarǵa húrmet ruwxında tárbiyalaw, ámeliy kónlikpelerin arttırıw hám jańa reformalardıń mazmunın tereń túsindiriw jolında áhmiyetli qádem boldı. Bunday ilajlar keleshekte huqıqıy jámiyettiń bekkem tiykarın jaratıwǵa, jaslardıń jámiyetlik belsendiligin arttırıwǵa hám insan huqıqların qorǵaw mádeniyatın qáliplestiriwge xızmet etedi.

Qaraqalpaqstan xabar agentligi.