16-20-fevral kúnleri aralıǵında Tashkent qalasında sport gimnastikası boyınsha jaslar arasında Ózbekstan chempionatı bolıp ótti.
Bul jarısqa elimizdiń barlıq aymaqlarınan eń kúshli jas gimnastlar qatnastı.
CHempionatta eń dáslep komandalıq kópgúres jarısları ótkerilip, onda Daniyar Polatov, Salamat Súyewbaev, Ramazan Qonısbaev hám Alixan Uzaqbaevtan ibarat respublikamız saylandı komandası Tashkent qalası hám Samarqand wálayatı komandasınan soń sıylı 3-orındı iyelewge miyasar boldı.
Sonday-aq, bul jarısta jekkelik bellesiwlerde qatnasqan Ruslan Saǵındıkov eki altın hám 1 gúmis medalın jeńip alıp, sport jankúyrelerin sheksiz quwanıshqa bóledi.
Bul sport jarısına jas gimnastlardı Ulıǵbek Adilbekov hám Serik Abuovlar tayarladı.
– 21-fevral kúni Qazaqstannıń Aqtaw qalasınan respublikamız sportshıları menen birgelikte oqıw-shınıǵıwlarǵa qatnasıw ushın 11 sportshı menen trener keldi, – deydi gimnastika boyınsha Qaraqalpaqstan Respublikası saylandı komandasınıń bas treneri Ulıǵbek Adilbekov. – Usı oqıw-shınıǵıwlarınan soń Nókis qalasında xalıqaralıq jarıs ótkeremiz. Sonday-aq, 10-mart kúni zamanagóy sport gimnastika orayında Ózbekstan chempionatı da ótkeriledi. Házirgi kúnleri respublikamız komandası bul jarıslarǵa puqta tayarlıqlar kórmekte.
Álbette, jas gimnastlarımızdıń qolǵa kirgizip atırǵan bul tabısı respublikamızda sport gimnastikasına qaratılıp atırǵan itibardıń ayqın kórinisi bolıp tabıladı.

Adilbay Orazov,
Qaraqalpaqstan xabar agentligi sholıwshısı