Házirgi kúnleri Qırǵız Respublikasınıń Osh qalasında futbol boyınsha «AFIM WINTER CUP»- U13 xalıqaralıq turiniri bolıp ótpekte.
Bul jarısqa jergilikli futbol akademiyalarınan tısqarı mámleketimizdiń jas futbolshıları da qatnasıp, jeńimpazlıq ushın óz-ara bellespekte.
Atap aytqanda, bul turnirde qatnasıp atırǵan Qaraqalpaqstan Respublikası futbol akademiyasınıń komandası dáslepki turda «Andijan» klubınıń tárbiyalanıwshıları menen oyınǵa túsip, olardı 11:1 esabında jeńgen bolsa, 2-turda maydan iyeleri menen 1:1 oynadı. Al, 3-turda bolsa, respublikamız futbolshıları Qırǵız Respublikasında jaylasqan Kataloniyanıń «Barselona» klubınıń «BARCA ACADEMY» komandası menen oynap, óz qarsılasların 2:3 esabında jeńip shıǵıwǵa miyasar boldı.
– 4-turda bolsa, komandamız aǵzaları Ferǵananıń «Neftchi» klubı tárbiyalanıwshıların 9:1 esabında jeńip shıqtı, – Qaraqalpaqstan Respublikası futbol akademiyası direktorı Damir Iskenderov. – Endi búgin sońǵı turda komandamız Ándijan wálayatınıń «Spartak-Andijan» klubına qarsı ótkeredi.
Jas futbolshılarımızdı bul jarısqa akademiya trenerlerinen Jetkerbay Qayıpnazarov hám Serik Axmetalievler tayarladı.

Adilbay Orazov,
Qaraqalpaqstan xabar agentligi sholıwshısı