Qońırat rayonında 2026-jıldıń zúrááti ushın egis máwsimine puqta tayarlıq kóriw, zamanagóy agrotexnologiyalardı engiziw hám awıl xojalıǵı tarawında ámelge asırılıp atırǵan tiykarǵı wazıypalardı dodalawǵa baǵıshlanǵan seminar bolıp ótti.
Onda Qaraqalpaqstan Respublikası Ministrler Keńesiniń Baslıǵı F.Ermanov, rayon hákimliginiń juwaplı xızmetkerleri, tarawlıq shólkemlerdiń basshıları, fermer xojalıqlarınıń basshıları hám awıl xojalıǵı qánigeleri qatnastı.
Seminar sheńberinde qatnasıwshılarǵa egiw hám tárbiyalaw processlerinde paydalanılatuǵın zamanagóy awıl xojalıǵı texnikaları, agrotexnologiyalıq qurallar hám materiallıq resurslar kórgizbeli túrde kórsetildi.
Ilajda 2026-jıldıń ónimi ushın egis jumısların nátiyjeli shólkemlestiriw, awıl xojalıǵı texnikalarınıń texnikalıq jaǵdayı hám máwsimge tayarlıǵın támiyinlew, mineral tóginler, gerbicidler hám basqa da zárúr qurallar menen óz waqtında támiyinlew máseleleri hár tárepleme dodalandı.
Sonday-aq, egiw texnikaların otryadlar kesiminde nátiyjeli bólistiriw, fermer xojalıqlarına ámeliy járdem kórsetiw jáne zamanagóy “Shinjon” usılı tiykarında plyonka qaplaw hám tamshılatıp suwǵarıw texnologiyaların engiziw arqalı joqarı ónimdarlıqqa erisiw boyınsha anıq wazıypalar belgilep alındı.
Atap ótilgenindey, bul seminar 2026-jıl zúrááti ushın bekkem tiykar jaratıw, awıl xojalıǵında nátiyjelilikti arttırıw hám tarawda aldınǵı texnologiyalardı keńnen engiziwde úlken áhmiyetke iye.
Seminar dawamında qatnasıwshılar qánigelerden ózlerin qızıqtırǵan sorawlarǵa juwap aldı.

Qaraqalpaqstan xabar agentligi