Mámleketimizde jas áwladtıń kitapqa bolǵan qızıǵıwshılıǵın arttırıw, olardıń ruwxıy dúnyasın bayıtıw máselesi mámleketlik siyasat dárejesine kóterilgen. Bul baǵdarda Ózbekstan Respublikası Prezidenti Shavkat Mirziyoevtiń 2026-jıl 15-yanvarda qabıl etilgen “Kitapqumarlıq mádeniyatın rawajlandırıw hám xalıq arasında kitap oqıwǵa qızıǵıwshılıqtı arttırıw ilajları haqqında”ǵı qararı tiykarında bilimlendiriw orınlarında kóplegen ilajlar shólkemlestirilmekte.
Usınday ilajlardıń dawamı sıpatında, usı jıldıń 17-fevral kúni Nókis qalalıq mektepke shekemgi hám mektep bilimlendiriw bólimine qaraslı 19-sanlı ulıwma orta bilim beriw mektebinde Ózbekstan xalıq shayırı Baxtiyar Genjemuratov penen «Qádiri bar elde qahan hár shayır» atamasında ádebiy-sáwbetlesiw keshesi bolıp ótti.
Ushırasıw dawamında shayır óziniń dóretiwshilik jolı, dáslepki qosıqlarınıń jazılıw tariyxı hám oqıwshılıq dáwirindegi qızıqlı waqıyaları haqqında aytıp berip, oqıwshılardıń qızıqtırǵan sorawlarına juwap berdi.
Ilajda mekteptiń talantlı oqıwshıları tárepinen shayırdıń «Móde xan hám Shın jipegindegi bitik» shıǵarması tiykarında tayarlanǵan saxnalıq kórinisi qoyıp berilip, bul jıynalǵanlarda úlken tásir qaldırdı. Sonday-aq, keshe dawamında oqıwshılar shayır qosıqların kórkemlep oqıp berdi.
– Kesheni ótkeriwden tiykarǵı maqset jaslar arasında kitapqumarlıqtı keńnen úgit-násiyatlaw hám milliy ádebiyatımızǵa bolǵan mehirin oyatıwdan ibarat, – deydi ilaj shólkemlestiriwshilerinen biri Aygúl Qosnazarova.
Ótkerilgen ilaj sońında oqıwshılar xalqımızdıń súyikli shayırı menen jaqınnan sáwbetlesip, onnan ruwxıy azıq aldı.

Saodat Shamshetdinova,
Berdaq atındaǵı QMUdıń Ámeliy filologiya fakulteti oqıtıwshısı.
Qaraqalpaqstan xabar agentligi