Qaraózek rayonı Qorǵanıw isleri bóliminde Jınayat isleri boyınsha Qaraózek rayonı sudınıń tergew sudyası R.Matqurbanov tárepinen «Korrupciyaǵa baylanıslı huqıqbuzarlıqlardı anıqlaw, onı toqtatıw hám oǵan belgilengen juwapkershilik» atamasında ushırasıw ótkerildi.
Ilajda mámleketimizde korrupciyaǵa qarsı gúresiw mámleketlik siyasattıń tiykarǵı baǵdarlarınan biri ekeni, bul baǵdarda ámelge asırılıp atırǵan huqıqıy reformalardıń áhmiyeti haqqında qatnasıwshılarǵa keń túrde túsindirildi.
Ushırasıwda korrupciyanıń aqıbeti pútkil jámiyetke unamsız tásir kórsetetuǵını, ol puqaralardıń mámleketke hám nızamlarǵa bolǵan isenimin hám ekonomikalıq rawajlanıwdı tómenletip, bunıń nátiyjesinde sociallıq teńsizliktiń kúsheyetuǵınlıǵı atap ótildi. Sonday-aq, bul jınayat ushın nızamda qatań juwapkershilik bar ekenligi principine toqtalıp, bul korrupciyaǵa qarsı gúresiwde sheshiwshi áhmiyetke iye ekeni kórsetip ótildi.
Ilaj sońında tergew sudyası R.Matqurbanov qatnasıwshılar menen ashıq sáwbetlesiw ótkerip, olardı qızıqtırǵan sorawlarǵa juwap berdi.
Álbette, respublikamız aymaqlarında bunday ushırasıwlardıń ótkeriliwi jámiyette korrupciyaǵa qarsı mawasasız múnásibetti qáliplestiriw, huqıqıy mádeniyattı arttırıw hám nızam ústinligin támiyinlewde úlken áhmiyetke iye bolıp tabıladı.

Adilbay Orazov,
Qaraqalpaqstan xabar agentligi sholıwshısı