Ózbekstanda texnikalıq jaqtan tártipke salıw hám sapa infrastrukturasın jetilistiriwge qaratılǵan reformalar izbe-iz dawam etpekte.
2026-jıl 16-fevral kúni qabıl etilgen Prezidentimizdiń “Texnikalıq jaqtan tártipke salıw tarawındaǵı reformalardı aldınǵı xalıqaralıq ámeliyat tiykarında jedellestiriw ilajları haqqında”ǵı pármanında tarawdı aldınǵı xalıqaralıq ámeliyat tiykarında túp-tiykarınan modernizaciyalawdıń tiykarǵı wazıypaları belgilep berildi.
Bul hújjette milliy sapa sistemasın xalıqaralıq standartlar dárejesine alıp shıǵıw, akkreditaciyalaw hám muwapıqlıqtı bahalaw processlerin ashıq-aydın hám nátiyjeli shólkemlestiriw, sonday-aq, mámlekettiń globallıq reytinglerdegi ornın jaqsılaw maqset etilgen.
Hújjetke bola, mámlekette milliy sapa infrastrukturasın rawajlandırıw tiykarǵı wazıypalardan biri etip belgilengen.
Pármanda 2026-jıl ushın bir qatar anıq maqsetli kórsetkishler názerde tutılǵan. Sonıń ishinde, Turaqlı rawajlanıw ushın sapa infrastrukturası indeksinde Ózbekstannıń ornın keminde 20 tekshege jaqsılaw rejelestirilmekte.
Sonday-aq, Xalıqaralıq tárezi hám ólshemler byurosı tárepinen tán alınǵan kalibrlew imkaniyatlarınıń sanın 2,5 esege arttırıw hám xalıqaralıq dárejede tán alınǵan akkreditaciya xızmetleriniń úlesin keminde 80 procentke jetkeriw názerde tutılǵan.
Shólkemlestiriwshilik ózgerisler de ámelge asırıladı.
Atap aytqanda, Ózbekstan akkreditaciya orayı Ministrler Kabinetiniń boysınıwına ótkeriledi. Bunnan tısqarı, Ózbekstan ilimiy-sınaq hám sapa qadaǵalaw orayınıń jumısı saplastırılıp, onıń quramındaǵı muwapıqlıqtı bahalaw uyımları biykar etiledi.
Sonıń menen birge, Ózbekstan standartlar institutı usı oraydı óz quramına qosıp alıw arqalı qayta shólkemlestiriledi.

Hamroz Bayanov, ÓzA