Házirgi kúni “Hududgaz Qoraqalpoǵiston” gaz támiynatı filialı, qala hám rayonlıq bólimleri xızmetkerleriniń barlıq dıqqat itibarı gúzgi-qısqı máwsimde artıqsha shıǵınlarsız ótkeriwge qaratılǵan.
Bunda jeke xojalıqlar, kóp qabatlı úyler, sociallıq áhmiyetke iye obektler hám mákan puqaralar jıyınları menen birgelikte jumıs alıp barıwǵa áhmiyet qaratılǵan. Úgit-násiyat jumısları waqtında tábiyǵıy gazden durıs paydalanıw, jasalma jılıtıw úskeneleri hám rezina shlangalardan paydalanıwdıń awır aqıbetleri haqqında túsindiriw jumısları alıp barılmaqta. Bunda taraw qánigeleri tutınıwshılarǵa gazden nızamsız paydalanbaw, ısıtıw qazanxanaları hám basqa da úskenelerdi texnikalıq tekseriwden ótkeriw zárúrligi atap ótilmekte.
Jılıtıw máwsiminde qazanxanalar hám gaz úskeneleriniń qáwipsiz islewi ushın úylerimizdegi qazanxana morıları hám samallatıw sistemasın jáne bir márte kózden ótkeriw lazım, -deydi «Hududgaz Qoraqalpoǵiston» gaz támiynatı filialınıń bólim baslıǵı Ájiniyaz Amanbaev. – Gaz qubırları jarılıp onnan záhárli gaz iyisi shıqqanda, jasaw jayımız tútinge tolǵanda saz halattaǵı samallatıw sisteması qáwipli hám zıyanlı zatlardı sırtqa shıǵarıp insan ómirin saqlap qalıwǵa sebep boladı. Sonlıqtanda jılıtıw sistemasın óz waqtında tekseriw hám texnikalıq tekseriw ótkeriw júdá áhmiyetli bolıp esaplanadı.

Adilbay Orazov,
Qaraqalpaqstan xabar agentligi sholıwshısı