Shveycariyanıń Jeneva qalasında AQSh hám Iran arasındaǵı yadrolıq sóylesiwdiń ekinshi basqıshı búginge belgilengen. Jaǵdaydan xabardar úsh derek Amerikanıń “Axios” málimleme platformasına bergen intervyuinde delegaciyalardıń tikkeley emes sóylesiwiniń ekinshi basqıshı “17-fevral, siyshembi kúni Jenevada ótkeriliwi rejelestirilgeni” haqqında xabar bergen.
Amerika delegaciyası quramında Prezident Donald Tramptıń Jaqın Shıǵıs boyınsha arnawlı wákili Stiv Uitkoff hám onıń kúyew balası Jared Kushner kiredi.
Iran delegaciyasına sırtqı isler ministri Abbos Aragchiy basshılıq etiwi kútilmekte. Oman sırtqı isler ministri Badir bin Hamad Al-Busaidiy dáldalshı wazıypasın atqaradı.
Sóylesiwlerdiń birinshi basqıshınıń juwmaǵı boyınsha AQSh hám Irannıń óz-ara bildiriwleri járiyalanǵan.
Maǵlıwmatlarǵa qaraǵanda, Uitkoff ótken hápteniń basında Oman SIM basshısı menen telefon arqalı sóylesken hám Vashingtonnıń yadrolıq sóylesiwge baylanıslı bildiriwinen xabardar etken. Busaidiy maǵlıwmattı Maskatqa kelgen Iran Joqarı Milliy qáwipsizlik keńesi Bas xatkeri Ali Larijoniyge jetkergen.
Iran mámleketlik televideniesine bergen intervyuinde Larijoniy AQShtan sóylesiw boyınsha xabar alǵanın tastıyıqladı. Ǵalaba xabar qurallarınıń xabar beriwinshe, ol Maskatqa saparı waqtında Busaidiyge Tegeran húkimetiniń múnásibetin jetkergen.
Kelisimge erisiw ushın sóylesiwler dawam etip atırǵanın bildirgen Tramp bılay dedi:
– Eger kelisimge erise almasaq, ekinshi basqıshqa ótemiz. Keyingi process iranlılar ushın júdá qıyın ótedi. Men bunı qálemeymen.
Esletip ótemiz, 2025-jıl iyun ayında Izrail hám AQShtıń Iranǵa hújimi artınan toqtap qalǵan yadro baǵdarlaması boyınsha ushırasıwlar 6-fevral kúni Omanda dawam ettirildi.
Islam Respublikası Sırtqı isler ministrliginiń baspasóz xatkeri Ismoil Bekaiy tómendegshe pikir bildirdi:
– Maskattaǵı ushırasıw hár eki tárep sóylesiwdi dawam ettiriwge tayar ekeni haqqındaǵı kelisim menen juwmaqlandı.
Bul retki sóylesiw Tegeran hám Vashington qarama-qarsılıǵı júdá kúsheygen, AQSh regiondaǵı áskeriy qatnasın kúsheytip atırǵan bir waqıtqa tuwra kelgen.

Gwzal Sattorova, ÓzA