Pútkil ómirin hám miynet jolın elimizdiń bilimlendiriw tarawınıń rawajlanıwına baǵıshlaǵan pidayı ustaz, awıl xojalıǵı ilimleriniń kandidatı, joqarı bilimlendiriwdiń aǵlası Karim Oybekovich Egamqulov usı jıldıń 14-fevral kúni 87 jasında qaytıs boldı.
Karim Egamqulov 1939-jılı 5-mayda Sırdárya wálayatınıń Gúlistan rayonında tuwıldı. 1964-jılı Tashkent mámleketlik pedagogikalıq institutın (házirgi Nizamiy atındaǵı Ózbekstan milliy pedagogikalıq universiteti) tamamlap, sol dárgayda úlken laborant bolıp jumıs basladı. Keyin usı instituttıń aspiranturasında bilim aldı hám kandidatlıq dissertaciyasın qorǵadı.
1969-1972-jılları Sırdárya wálayatı “Bilim” jámiyetiniń juwaplı xatkeri bolıp islep, xalqımızǵa aǵartıwshılıq hám máripat úlestiriwge múnásip úles qostı.
1972-1975-jılları Sırdárya mámleketlik pedagogikalıq institutı prorektorı wazıypasında nátiyjeli jumıs alıp barıp, óziniń jetekshilik potencialın, shólkemlestiriwshilik hám intakerlik pazıyletlerin kórsetti.
1975-1987-jılları Tashkent irrigaciya hám awıl xojalıǵın mexanizaciyalastırıw injenerleri institutınıń Yangier filialınıń direktorı lawazımında xızmet etip, respublikamızda taraw ushın joqarı maman kadrlardı tayarlaw jumıslarında pidayılıq kórsetip miynet etti.
Karim Egamqulov ilimdi ámeliyat penen baylanıstırıp, atap aytqanda, awıl hám suw xojalıǵı bilimlendiriwin hám ámeliyatın rawajlandırıw baǵdarında ózine tán tájiriybe mektebin jarattı.
Irrigaciya hám awıl xojalıǵı tarawına baylanıslı 20 dan aslam oqıw-metodikalıq qollanbalar hám sabaqlıqlardıń avtorı sıpatında tanıldı.
Tájiriybeli hám aldıńǵı pedagog Tashkent irrigaciya hám awıl xojalıǵın mexanizaciyalaw injenerleri institutınıń mamanlıǵın arttırıw fakulteti dekanı, topıraqtanıw kafedrasınıń baslıǵı, Sırdárya wálayatı esapshılardı qayta tayarlaw oqıw orayınıń direktorı wazıypalarında da nátiyjeli miynet etip, respublikamızdıń irrigaciya hám awıl xojalıǵı tarawı wákilleriniń ámeliy bilim hám kónlikpelerin bekkemlew, olardı zamanagóy ilim jetiskenlikleri menen tanıstırıw jumısların nátiyjeli shólkemlestirdi.
Sońǵı jılları úlken jasta bolıwına qaramastan, pidayı jámiyetshi, úlken turmıslıq tájiriybege iye aqsaqal sıpatında elimizde ámelge asırılıp atırǵan reformalar, awıl hám máhállelerdi abat etiw, xalıqtıń turmıs sharayatın jaqsılawǵa qaratılǵan iygilikli jumıslardıń nátiyjesin úgit-násiyatlap keldi. Óziniń dana másláhátleri menen jaslarımızdı ana Watanǵa muhabbat hám sadıqlıq, milliy hám ulıwma insanıylıq qádiriyatlarǵa húrmet ruwxında tárbiyalaw jolındaǵı jumıslarǵa bas-qas boldı.
Joqarı potenciallı ilimpaz, jaslardıń mehriban ustazı, kishipeyil insan Karim Egamqulovtıń esteligi kewillerimizde máńgi saqlanıp qaladı.

Sh.Mirziyoev, T.Norboeva, N.Ismoilov,
A.Aripov, S.Turdiev, E.Turdimov