Mámleketimiz basshısınıń “Mámleketti rawajlandırıwdıń 2030-jılǵa shekem mólsherlengen tiykarǵı baǵdarları sheńberinde reformalardı izbe-iz dawam ettiriw hám jańa basqıshqa alıp shıǵıwdıń qosımsha ilajları haqqında”ǵı pármanı qabıl etildi.
Párman menen “Ózbekstan – 2030” strategiyası sheńberinde erisilgen jetiskenlikler hám mashqalalardı esapqa alǵan halda nátiyjelilik kórsetkishleri belgilenedi.
Endi strategiyadaǵı maqsetlerge erisiliwin monitoring etiw processleri tolıq sanlastırıladı.
Sanlı platformada “Ózbekstan – 2030” strategiyası maqsetleriniń nátiyjelilik kórsetkishlerine erisiliwi jaǵdayı tómendegi kategoriyalarǵa ajıratıladı: “jasıl” – belgilengen nátiyjelilik kórsetkishine óz waqtında hám tolıq erisilgen; “sarı” – belgilengen nátiyjelilik kórsetkishine erisiwde keshigiwler bar, biraq olardı saplastırıw imkaniyatı bar; “qızıl” – nátiyjelilik kórsetkishine erisiwde ayrıqsha keshigiwler bar yamasa olarǵa ulıwma erisilmegen.
“Jasıl” kategoriyaǵa kirgizilgen nátiyjelilik kórsetkishlerine juwapker uyımlar xoshametlenedi. “Sarı” kategoriyaǵa kirgizilgen nátiyjelilik kórsetkishlerine erisiwdegi keshigiwlerdiń sebepleri tallanadı hám olardı saplastırıw maqsetinde Ministrler Kabineti tárepinen tiyisli uyımǵa zárúr ilajlardı kóriw boyınsha kórsetpeler beriledi. “Qızıl” kategoriyaǵa kirgizilgen nátiyjelilik kórsetkishlerine juwapker uyımlardıń jumısı Ministrler Kabineti Prezidiumında sın kózqarastan kórip shıǵıladı.

N.Abduraimova, ÓzA