BMSh Azıq-awqat hám awıl xojalıǵı shólkemi (ǴAO) tárepinen búgin járiyalanǵan maǵlıwmatqa bola, globallıq dárejedegi azıq-awqat bahası yanvar ayında jáne tómenlegen. Bunday jaǵday izbe-iz bes aydan berli baqlanıp atırǵanın atap ótiw kerek. Esabatta aytılıwınsha, tiykarınan sút ónimleri, qumsheker hám gósh sawdasında ózgeris anıq sezilmekte.
Atap ótiliwinshe, ortasha baha dekabr ayına salıstırǵanda 0,4 procent, ótken jılǵa salıstırǵanda 0,6 procent tómenlegen.
Biyday hám mákke biraz arzanlasqanına qaramastan, dán 0,2 procent qımbatlaydı. Iri biyday rezervi Rossiya hám AQShta qısqı eginler ushın júzege kelgen hawa-rayı qáwpin qapladı. Mákke rezervi bolsa Argentina hám Braziliyadaǵı qolaysız klimat tásiri hám AQShta etanolǵa talaptıń artıwı sebepli baqlanǵan qıyın jaǵdaydı ońladı. Gúrish bahası ortasha 1,8 procentke kóterildi.
Ósimlik mayınıń bahası 2,1 procentke artqan. Qubla-shıǵıs Aziyada óndiris máwsimlik dárejede azayıwı hám importqa talaptıń kúsheyiwi sebepli globallıq palma mayı qımbatladı, soya mayınıń bahası bolsa Qubla Amerikadan eksporttıń azayıwı hám Qurama Shtatlarda biologiyalıq janılǵıǵa talaptıń artıwı tiykarında kóterildi.
Qara teńiz regionında támiynattıń shekleniwi artınan ayǵabaǵar mayınıń bahası da arttı. Sonıń menen birge Evropa Awqamında import muǵdarınıń sezilerli dárejede artıwı sebepli raps mayı tústi.
Góshtiń bahası 0,4 procentke tómenlegeni atap ótildi. Bul jaǵday globallıq usınıs jeterliligi hám talap ázziligi menen baylanıslı. Qus góshiniń qımbatlawınıń sebebi bolsa eksport talabı kúshli Braziliyada baha kóterilgen.
Mal hám qoy góshiniń bahası turaqlı bolıp qalmaqta. Qurama Shtatlarda bajısız kvota tez tolıp qalsa da, Braziliyadan Qıtayǵa jetkerip beriw kóbeygeni ushın krizistiń aldı alınǵan.
Sút ónimleriniń bahası bes procentke arzanladı. Sır hám sarı may bahası eń kóp túskeni baqlandı. Buǵan sebep – támiynat jeterli. Nátiyjede, Jaqın Shıǵıs, Arqa Afrika hám Aziyanıń ayırım aymaqları menen baylanıslı jańalanǵan talap sharayatında maysız sút untaǵınıń bahası artqan.
Esabatta qumsheker bahası 1 procentke túskeni keltirilgen. ǴAO bunı Hindstanda óndiristiń tikleniwi, Tailand ushın unamlı boljaw hám Braziliyadaǵı unamlı ózgeris sebepli usı máwsim globallıq usınıs artıwına baylanıslı kútilip atırǵan nátiyje menen baylanıstırmaqta.
ǴAO globallıq dán ónimlerin islep shıǵarıw boyınsha gezektegi boljawdı járiyaladı: ulıwma islep shıǵarıw 3,023 milliard tonnaǵa jetiwi kútilmekte. Bul rekord kórsetkish.
Ósiw baǵıtı Argentina, Kanada hám Evropa Awqamında biyday ónimi mólsherden artıwı, sonday-aq, Qıtay hám AQShta mákke egetuǵın maydan keńeyiwi hám ónimdarlıq joqarı bolıwın bildirgen. Gúrish jetistiriw tiykarınan Hindstan, Bangladesh, Braziliya, Qıtay hám Indoneziyada rawajlanıwı kútilmekte.

S.Rahimov, ÓzA