Bunnan derlik bir ay burın Yaponiyanıń «Joho Bencha» kompaniyasınıń direktorı mırza Kay Koutaru Berdaq atındaǵı Qaraqalpaq mámleketlik universiteti rektorı B.Jollıbekov penen ushırasıp, studentlerge shet tillerin, sonıń ishinde, yapon tilin úyretiw, olardı xalıqaralıq qánigelik hám til imtixanlarına tayarlaw, pitkeriwshilerdi tikkeley Yaponiya kompaniyalarına jumısqa ornalastırıw máseleleri dodalaǵan edi.
Jaqında usı kompaniya direktorı Kay Koutaru Berdaq atındaǵı Qaraqalpaq mámleketlik universiteti studentleri menen ushırasıp, olarǵa Yaponiyada jumısqa ornalasıw tártibi, imkaniyatları, miynet sharayatları, talabanlarǵa qoyılatuǵın talaplar, sonday-aq, Yaponiyanıń miynet nızamshılıǵı hám korporativ mádeniyatı haqqında aytıp berdi.
Usılar menen bir qatarda, kompaniya tárepinen birge islesiw sheńberinde universitetke yapon tili boyınsha maman qánige tartıladı. Ol 8 ay dawamında studentlerge sabaq berip, yapon tilin tereń úyreniw, kásiplik jumısqa tayarlıq kóriw, Yaponiyada jumıs islew ushın zárúr bilim hám kónlikpelerdi qáliplestiriwge járdemlesedi.
Álbette, bul baslama jaslardıń xalıqaralıq miynet bazarında básekige shıdamlılıǵın arttırıw, olardıń kásiplik potencialın joqarılatıw hám Yaponiya menen bilimlendiriw tarawında birge islesiwin bekkemlewde áhmiyetli qádem bolıp xızmet etedi.

Adilbay Orazov,
Qaraqalpaqstan xabar agentligi sholıwshısı