Arqa-batıs áskeriy okruginiń Ruwxıylıq hám aǵartıwshılıq orayında ullı babamız Záhiriddin Muhammed Babur tuwılǵan kúniniń 543 jıllıǵı múnásibeti menen ruwxıy-aǵartıwshılıq ilaj shólkemlestirildi.
Ilajǵa Qaraqalpaqstan Respublikası Berdaq atındaǵı akademiyalıq muzıkalı drama teatrı jámááti, filarmoniya orkestri, Qaraqalpaq mámleketlik universiteti hám Nókis mámleketlik pedagogikalıq institutınıń professor-oqıtıwshıları qatnastı.
Ilaj dawamında Baburdıń ómiri hám dóretiwshiligine baǵıshlanǵan saxnalıq kórinisler qoyıp berildi. Teatr jámááti tárepinen atqarılǵan kórkem kompoziciyalar ullı babamızdıń quramalı, biraq maqtanıshlı ómir jolın janlı súwretlep berdi. Aktyorlardıń sheber atqarıwı tamashagóylerdi XV-XVI ásirler ortalıǵına alıp kirip, sol dáwirdiń tariyxıy hám mádeniy kórinislerin janlandırdı.
Filarmoniya orkestriniń atqarıwındaǵı klassikalıq nama-qosıqlar ilajǵa ózgeshe ruwx baǵıshladı. Hár bir nama Babur dáwiriniń ruwxıy nápesin esletip, qatnasıwshılarda maqtanısh hám tolqınlanıw oyattı. Ilajda Babur tek ǵana qúdiretli mámleketlik ǵayratker hám sheber sárkarda sıpatında emes, al názik talǵamlı shayır hám tereń oy iyesi sıpatında eske alındı.
Professor-oqıtıwshılar tárepinen Babur miyrasınıń tariyxıy hám ádebiy áhmiyeti tereń talqılandı. Olar Baburdıń mámleketlik basqarıwdaǵı sheberligi, diplomatiyalıq potencialı, ilim hám mádeniyatqa itibarı haqqında sóz etti. Ásirese, Babur shaxsında mártlik hám názik júrek úyleskeni ayrıqsha atap ótildi.

Qaraqalpaqstan xabar agentligi