Xojeli rayonında Ózbekstan Respublikası Prezidentiniń 2026-jıl 5-yanvardaǵı “Respublika máhállelerinde qáwipsiz ortalıqtı jaratıw baǵdarında birden-bir mánzilli jumıs islew sistemasın engiziwge qaratılǵan qosımsha ilajlar haqqında”ǵı qararınıń orınlanıwı boyınsha islengen jumıslar kórip shıǵılıp, sın kózqarastan dodalandı.
Májiliste Qaraqalpaqstan Respublikası prokurorı Sh.Aminov qatnasıp, rayonda júz bergen jámi jınayatlardıń 68 procentin aldın alıw múmkin bolǵan jınayatlar quraytuǵını, 26 máhállede shańaraq-turmıs, qońsıshılıq hám basqa da qatnasıqlar tiykarındaǵı sociallıq-turmıslıq túrdegi jınayatlar júz bergenligi hám shańaraqlıq zorlıqlardıń keskin artıp ketkenligi, oǵan sebep juwapkerler hám máhálle jetiligi nátiyjeli hám birgelikte jumıs alıp barmaǵanlıǵı keskin sınǵa alındı.
Juwapkerlerge sociallıq profilaktika jumısların nátiyjeli shólkemlestiriw, shańaraq-turmıslıq qatnasıqlar sheńberinde jınayatlardı, shańaraqlıq zorlıqlardıń aldın alıwdıń keskin ilajların kóriw, jınayatlardıń sebep hám faktorların anıqlap, erte saplastırıw, sociallıq profilaktika ilajların kúsheytiw sıyaqlı wazıypalar belgilep berildi.
Bunnan soń, rayonnıń “Jańa jap” máhállesinde bolıp, máhálle jetiligi wákilleriniń qatnasıwında aymaqta júz bergen jınayatlardıń sebep hám faktorların anıqlap saplastırıwǵa qaratılǵan jumıslar, qarardıń orınlanıwın támiyinlew baǵdarında islep shıǵılǵan “Jol karta”sı bántleriniń orınlanıwında jol qoyılǵan qáte-kemshilikler sın kózqarastan kórip shıǵılıp, jınayatlardıń erte aldın alıw, profilaktikalıq ilajlardı nátiyjeli shólkemlestiriw, juwapkerler hám máhálle jetiligi tárepinen birgeliktegi jumıslardı durıs jolǵa qoyıw boyınsha tapsırmalar berildi.
Shańaraqlıq zorlıqlar júz bergen shańaraqlarda úyreniwler alıp barıldı hám shańaraqlıq zorlıqtan jábir kórgen balalardıń jaǵdayınan xabar alındı, sharayatlar, mashqalalar úyrenildi.

Qaraqalpaqstan xabar agentligi